“Ədəbiyyat və incəsənət” portalı gənc yazar Elşad Baratın şəhidlər barədə silsilə şeirlərinin təqdimini davam etdirir.

Şəhid Nicat Mənəfov 

Nicat Mənəfov 2000-ci ilin 18 yanvarında Qax rayonunun Qaradolaq kəndində anadan olub. 2007-ci ildə Qaradolaq kənd orta məktəbində təhsil almağa başlamışdır. 2016-ci ildə 9-cu sinfi bitirib, Qax Peşə Liseyinə qəbul olmuş. Peşə Liseyini “Meliorasiya” ixtisası üzrə bitirdikdən sonra 8 may 2020-ci ildə Azərbaycan Silahlı Qüvvələrinin sıralarında həqiqi hərbi xidmətə yollanmışdır. Füzuli uğrunda gedən döyüşlərdə iştirak etmişdir. 4 noyabr 2020-ci ildə Şuşanın alınması uğrunda gedən döyüşlərdə şəhid olmuşdur.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Nicat Mənəfov ölümündən sonra "Vətən uğrunda" medalı ilə təltif edilmişdir.

Şuşa alınmaz qala,

Şuşa qəhrəman şəhər.

Şəhidlərin canıyla,

Cana gələn can şəhər.

Ey qəhrəman şəhidim,

Sən Şuşanı almısan,

Bu xalqın tarixində,

İgid kimi qalmısan.

Qalmısan ürəklərdə,

Daş üstə yazı kimi.

Koroğlunun nərəsi,

Qorqudun sazı kimi.

Sən on doqquz yaşında,

Belə qəhrəman oldun,

Bu vətənin canından,

Ayrılmayan can oldun.

Hələ yaran göynəyir,

Hələ ovutmamışıq.

Tarix səni unutmaz,

Biz də unutmamışıq.

“Ədəbiyyat və incəsənət”

(09.09.2024)