“Ədəbiyyat və incəsənət” portalı gənc yazar Elşad Baratın şəhidlər barədə silsilə şeirlərinin təqdimini davam etdirir.

Şəhid Ramil Babayev

Ramil Babayev 1991-ci il dekabrın 12-də Kürdəmir rayonunun Şilyan kəndində anadan olub. O, ilk təhsilini Kürdəmir şəhər 1 saylı orta məktəbdə alıb. Məktəbi bitirdikdən sonra öz istəyi ilə Cəmşid Naxcıvanski adına Hərbi Liseyində təhsil alıb. Daha sonra təhsilini Ali Hərbi Akademiyada dava etdirərək oranı bitirib və zabit rütbəsi alıb. İlk xidmətə Goranboy rayonunda başlayıb və xidməti boyunca vətənə layiqli xidmət edib və dəfələrlə komandirləri tərəfindən mükafatlara layiq görülüb. Ailədə üç uşağın ən kiçiyi olan Ramil həmişə yaşadığı rayonda da igid, cəsur, vətənpərvər oğul kimi tanınıb.

Ramil Babayev ailəli idi, onun bir oğul və bir qız övladı var. Yeni doğulan oğlunun anadan olmasından xəbərsiz şəhid oldu. Ailəsi isə yeni doğulan körpəyə şəhid atasının adını qoyub.

Azərbaycan Ordusunun baş leytenantı olan Ramil Babayev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murovdağ istiqamətində gedən döyüşlərdə savaşıb. Ramil Babayev sentyabrın 27-də Murovdağ döyüşləri zamanı şəhid olub. Uzun müddət nəşi tapıla bilməyib. 2021-ci il yanvarın 31-də Kürdəmir rayonunda dəfn olunub.

Otuz ildir bu xalqa,

“Məğlub xalq” deyirdilər.

Hamının düşüncəsin,

Sənin kimi oğullar,

Kökündən dəyişdilər.

Dəyişdilər zamanın,

Geri dönən çarxını,

Götürdülər bu xalqın,

Üzündəki qorxunu.

Azərbaycan xalqının,

İgidlik, qorxmazlığın,

Dünyaya sübut edib,

Torpaqları aldılar,

Yeni bir tarix yazıb,

Şanlı zəfər çaldılar.

Yenə də o millətik,

Yenə də o əsgərik.

Nə qədər ki biz varıq,

Sizləri unutmarıq.

“Ədəbiyyat və incəsənət”

(06.09.2024)