“Ədəbiyyat və incəsənət” portalı gənc yazar Elşad Baratın şəhidlər barədə silsilə şeirlərinin təqdimini davam etdirir.

Şəhid Hüseyn Zeynallı

Vətən müharibəsi şəhidi çavuş Zeynallı Hüseyn Vətənxan oğlu11 aprel 1993-cü ildə Cəlilabad rayonunun Əliabad kəndində anadan olub. Orta məktəbi əla qiymətlərlə oxuyub. Uşaqlıqdan idmanla məşqul olub. On ildən çox boksa gedib. Dəfələrlə bölgələrdə keçirilən yarışlarda qalib olub, iki dəfə ölkə çempionu adı qazanıb. Məktəbi bitirdikdən sonar hərbi xidmətə gedib. On ilə yaxın Daxili qoşunlar və Milli orduda xidmət edib. Xidməti zamanı dəfələrlə fəxri fərmanlar alıb.

Hüseynin atasını ziyarətə gələn döyüş yoldaşları bildirir ki, Hüseyn sanki öncədən şəhid olacağını bilirdi, Azərbaycan bayrağını sinəsinin üstünə qoyaraq döyüşə girmişdi. Ən yaxın dostu ilə ön cərgədə vuruşurdu. Elə həmin dostu ilə bir-birinə mərmi dəyməsin deyə canlarını bir-birinə sipər edib, yəni qucaqlaşıb şəhid olmuşdular.

Hüseyn Zeynallı 2020-ci il oktyabrın 1-i Füzulinin azadlığı uğrunda gedən döyüşlərdə qəhrəmancasına şəhid olub.

Azərbaycan Respublikasının Prezidenti İlham Əliyevin Sərəncamlarına əsasən Zeynallı Hüseyn Vətənxan oğlu ölümündən sonra "Vətən uğrunda" və "Füzulinin azad olunmasına görə" medalları ilə təltif edilib.

Məzarına yağan yağış

Buludların göz yaşıdır.

İndi sənin tək qardaşın

Hamımızın qardaşıdır.

İndi sənin ağsaç anan,

Bu vətənin anasıdır.

Şəkillərin atan üçün,

Yaşamağın mənasıdır.

Sən müqəddəs şəhidliklə

Bu vətənin hər yerisən.

Qəhrəmanlıq, igidliklə

Savaşın zəfər yerisən.

Tarix səni yaddışına

Qızıl hərflərlə yazıb.

Tanrı sənin taleyini

Cənnətdə kimlərlə yazıb?

Məqamın ucadan uca,

Cənnət müqəddəslər yeri.

Bütün qəlbiylə Allaha

Yaxın olan kəslər yeri.

Yerin mübarəkdi, şəhid,

Bircə şeir tutmaz səni.

Rahat uyu, əziz qardaş.

Bu millət unutmaz səni.

 “Ədəbiyyat və incəsənət”

(13.08.2024)