Əli Bağış, “Ədəbiyyat və incəsənət” portalı üçün
1. Böyük-böyük adamların kiçik-kiçik işlər görməsinin yalnız bir səbəbi var: Böyük işləri kiçik, çox kiçik adamların oğurlaması!
2. Kimin nə, necə dediyinə yox, niyə dediyinə baxın.
3. Oğluma: Atam atandan böyük kişi olub, özüm özündən!
4. Zəif olanda hamı ədalətli olur, Kişi odur ki, güclü olanda ədalətli olsun.
5. Haqlıyamsa, yanımda deyilsənsə, lənət olsun sənə, haqsızamsa, yanımdasansa, lənət olsun mənə...
6. Söz, Əməl, Adam arasındakı tərs mütənasiblik belədir: Sözlə Əməl arasındakı məsafə kiçildikcə Adam böyüyür, Sözlə Əməl arasındakı məsafə böyüdükcə Adam kiçilir!!!
7. Çox şərəfsizin kişi olduğu ayaqyolunda "Kişi" yazılmış lövhəyə sarı gedəndə yadına düşür...
8. Övladlarımıza heç bir sərvət saxlaya bilmiriksə, heç olmasa "Allah rəhmət eləsin, atan yaxşı Adam olub, bala"-nı saxlamaq ki öz əlimizdədir...
9. Həyatda ən qəliz şey bir adamı tanımaqdı. Tanıyandan sonra həyat o qədər asan olur ki...
10. Ən gözəl sözləri şairlər, tamadalar, mollalar seçib danışırlar. Mənə sözünü yox, Əməlini göstər eee...
11. Allahın sığorta idarəsi işləmir: Heç kim Heç vaxt Heç nədən sığortalanmayıb.
“Ədəbiyyat və incəsənət”
(10.01.2024)
