Nihad Alimoğlu, “Ədəbiyyat və incəsənət”

Sovetlər vaxtı bizim doğma Sumqayıt şəhərinə ölü şəhər adı qoyulmuşdu. Niyə? Çünki insan sağlamlığı üçün ən zərərli müəssisələr məhz bu şəhərdə inşa edilmişdi, Kimya poliqonu burda idi. Bakı da ekoloji cəhətdən ən əlverişsiz şəhərlər sırasında idi. Neft emalı zavodları Qara şəhər adlı bir kabus yaratmışdı. 

Müstəqillik bizim ekologiyanı xilas etdi - belə deyirlər. Amma tamamiləmi? 

Əlimdə Ekologiya və Təbii Sərvətlər Nazirliyinin mətbuat xidmətinin məlumatı var. Deyilir ki, atmosfer havasının keyfiyyətinin monitorinqi gündəlik olaraq Bakı şəhərinin Səbail, Xətai, Nizami, Nərimanov rayonları və Sumqayıt, Gəncə şəhərləri ərazisində hava keyfiyyəti üzrə fasiləsiz fəaliyyət göstərən avtomatik stansiyalar vasitəsilə həyata keçirilir.

Stansiyalardan əldə edilən məlumatların təhlilinə əsasən gün ərzində Bakı şəhəri üzrə hava keyfiyyət göstəricilərindən dəm qazı 1.4, kükürd qazı 1.1, Sumqayıt şəhərində azot-4 oksid 1.2 dəfə normadan yüksək müəyyən edilib.

Dəm qazı, kükürd qazı və azot-4 oksidin miqdarının normadan yüksək olmasına səbəb nəqliyyatın hərəkətinin intensiv xarakter daşıması, sənaye müəssisələrinin fəaliyyəti və insan faktoru ilə əlaqədardır.

Onsuz da məişət problemlərindən dolayı stresslər insanlarımızı çox əzir, sağlamlıqda fəsadlar yaranır. Qeyri-sağlam ekolojiyanı da üstünə gələk, görün bir nə əmələ gəlir.

Mən əlaqədar qurumlara səslənirəm, ölçü götürün! Eyni zamanda nasaz maşınlarla havanı zibilləyən məsuliyyətsiz sürücülərə səslənirəm, haqqa qayıdın. 

“Ədəbiyyat və incəsənət”

(14.11.2023)