Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Qovurmali göbələyin hazırlanma qaydasını təqdim edəcəyik. 

Nuş olsun!

DÜSTUR:

§ Qovurma – 80 qr

§ Göbələk – 100 qr

§ Soğan – 35 qr

§ Kök – 30 qr

§ Bolqar bibəri – 20 qr

§ Acı bibər – 10 qr

§ Pomidor – 35 qr

§ Alça (təzə və ya qurusu sarı) –

10 qr

§ İstiot – 0,5 qr

§ Duz – 4 qr

Xörək əlavəsi:

§ meyvə turşusu – 25 qr

HAZIRLANMASI:

Göbələk yuyulur, təmizlənir, doğranır. Balaca göbələklər bütöv halda, orta ölçülü 2 yerə, böyük ölçülülər 4 yerə bölünür. Soğan, kök, bibərlər yuyulur, təmizlənir. Dördkünc formada doğranır. Pomidorlar 4 yerə bölünür. Qovurma qazana yığılır və ocağa qoyulur. Qovurma tam qızdıqda soğan qazana əlavə olunur və qarışdırılır. Soğan qızardıqda kök, bibər, göbələk əlavə edilir. Göbələk suyunu buraxıb, qovurma və tərəvəzlərlə bir yerdə bişir. Yağa düşənə yaxın pomidor əlavə edilir. Bunlar 5 dəqiqə tovlanır. Duz, istiot və ədviyyatlar vurulur, bir az tovlanır. Altı söndürülür, ağzı bağlanır və dəm almağa qoyulur. 30-35 dəqiqə müddətində bişirilir. Süfrəyə veriləndə üzərinə göyərti səpilir, yanında turşu (meyvə) verilir.

QEYD: I variant – İrəvan mətbəxinə aid olan bu xörəkləri bir yerdə, eyni qazanda bişirəndə xörəyin dadı tamam başqa olur. 

II variant – ərzaqlar ayrıca bişirilir, qovrulur. Sonra ardıcıl olaraq bir qazana əlavə olunur və bişirilir.

“Ədəbiyyat və incəsənət”

(31.10.2024)