Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə Qoyun içalatı kababı: xan kababının hazırlanma qaydasını təqdim edəcəyik.
Nuş olsun!
DÜSTUR
§ Qoyun içalatı – 117 qr
§ Pərdə – 50 qr
§ Pomidor – 30 qr
§ Soğan – 20 qr
§ Mərzə – 10 qr
§ Duz – 4 qr
§ İstiot – 0,05 qr
Xörək əlavəsi:
§ soğan – 20 qr, sumaq – 5 qr, göyərti – 10 qr, nar – 15 qr, lavaş – 15 qr
HAZIRLANMASI:
İki üsulla hazırlanır:
I ÜSUL: Içalat təmizlənir, xırda doğranır və yaxud ət maşınından keçirilir. Xırda doğranmış soğan, pomidorun ətli hissəsi, mərzə, duz, istiot qarışdırılır. Müəyyən ölçüdə kəsil- miş quzu qarnının pərdəsinə boğça şəklində bükülür. Pərdənin ölçüsü 8x8 sm, hər boğçanın çəkisi isə 50-60 qr olur. Xan boğça kababı manqalda, kürədə, təndirdə, tavada bişirilə bilər. Süfrəyə verəndə boşqaba və ya buluda qoyulur. Doğranmış soğan, göyərti, nar dənəsi, sumaq birlikdə qarışdırılır, xan kababının yanında qarnir kimi verilir. Süfrəyə meyvə turşuları ilə verilir.
II ÜSUL: Tərkibi eynidir. Hazırlanmasında fərq ondadır ki, içalat 35- 40 qramlıq tikələrə doğranır, mərzə, duz, istiot vurulur, şişə taxılır, şişin üstündə pərdəyə bükülür və manqalda qızardılır. Süfrəyə verilmə qaydası eynidir. Bu xörək çoban bükməsi (dürməyi) də adlandırılır.
“Ədəbiyyat və incəsənət”
(10.09.2024)
