Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Quzu (qoyun) kababının

hazırlanma qaydasını təqdim edəcəyik. 

Nuş olsun!

DÜSTUR 

§ Quzu əti – 237 qr

§ Duz – 4 qr

§ İstiot – 0,05 qr

Xörək əlavəsi:

§ soğan – 20 qr, sumaq – 3 qr, göyərti – 10 qr, nar – 15 qr, meyvə turşuları – 15 qr, lavaş – 20 qr

HAZIRLANMASI:

Quzunun bel, budunun yumşaq hissəsi, qol hissəsi 40-50 qramlıq tikələr şəklində doğranır (əgər qoyun əti olarsa, ətə duz, istiot, kəklikotu və ya mərzə, soğan vurulub basdırma hazırlanır). Manqal hazırlanır, tikələr şişlərə taxılır (sümüklü və yumşaq hissələr ayrı-ayrı) və bişirilir. Şişə taxıldıqdan sonra duz, istiot vurulur. Közə düşmüş manqalın üstünə qoyulur, tez-tez çevrilir. Süfrəyə verəndə yanında aypara şəklində doğranmış soğan, xırda doğranmış göyərti, nar dənəsi qarışığı, lavaş, sumaq, meyvə turşuları (məti) verilir. Hər paya 4-5 tikə düşür. Yanında pomidor, bibər, badımcan kababı da vermək olar. Kababın bişmə müddəti 12-15 dəqiqə təşkil edir.

“Ədəbiyyat və incəsənət”

(09.09.2024)