Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə Kəklik - köz bibər müsəmməsinin hazırlanma qaydasını təqdim edəcəyik.
Nuş olsun!
DÜSTUR
§ Kəklik – 200 qr
§ Soğan – 35 qr
§ Ərinmiş kərə yağı – 25 qr
§ Qırmızı bolqar bibəri – 70 qr
§ Yaşıl bolqar bibər – 70 qr
§ Paxla – 25 qr
§ Zirinc – 20 qr
§ Göyərti – 8 qr
§ Sarımsaq – 2 qr
§ Təzə zəncəfil – 1 qr
§ Limon duzu – 0,1 qr
§ Sarıkök – 0,1 qr
§ Duz – 4 qr
§ İstiot – 0,05 qr
HAZIRLANMASI:
Kəklik təmizlənir, ütülür, 2-3 saat ərzində duzlu suda saxlanılır. Sudan çıxarılır və 4 hissəyə bölünür, yeni- dən yuyulur, təmizlənir. Tava qızdırılır, kərə yağı qoyulur. Doğranmış kəkliklərin hər iki tərəfi qızardılır. Sonra aypara şəklində doğranmış soğan əlavə edilərək qızardılır. Soğan qızarana yaxın xırda doğranmış sarımsaq, sürtkəcdən keçirilmiş zəncəfil, duz, istiot, sarıkök, bir miqdar su əlavə edilir və ehtiyatla qarışdırı- lır. Tavanın ağzı qapaqla bağlanır və bişirilir. Bişib yağa düşdükdə qabığı soyulmuş, bişirilmiş paxla, isladılıb yuyulmuş zirinc əlavə edilir və qarışdırılır, 5 dəqiqə bir yerdə tovlanır. Ağzı bağlı vəziyyətdə 5 dəqiqə yer dəmi alır. Bu müddət ərzində bibər- lər közdə bişirilir, qabığı soyulur, saplağı, içi çıxarılır, üzərinə limon duzu, duz səpilir. Müsəmmə boşqaba çəkilir, üzərinə közlənmiş bibərlər düzülür, doğranmış göyərti səpilir və süfrəyə verilir. Plov və çilovla da verilə bilər. Süfrəyə veriləndə yanında meyvə turşuları (məti), tərəvəz tur- şuları, dənələnmiş nar, göyərti, pomidor, xiyar qoyulur.
QEYD:
Bu müsəmmə bütün növ çöl, su quşlarından hazırlana bilər: turac, bildirçin, qaşqaldaq, qırqovul, qaz, ördək, çöltoyuğu və s. Paxla İrəvan mətbəxində çox istifadə olunur. Paxlanın dənələri böyük olduğu üçün “at paxlası” da adlandırılır. Onu da qeyd edək ki, paxladan həm quru, həm də yaz vaxtı təzə halda müxtəlif xörəklərin bişirilməsində istifadə olunur.
“Ədəbiyyat və incəsənət”
(14.08.2024)
