Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə İçi doldurulmuş

çöl ördəyi mütəncəminin hazırlanma qaydasını təqdim edəcəyik. 

Nuş olsun! 

DÜSTUR 

§ Çöl ördəyi – 159 qr

§ Kərə yağı – 32 qr

§ Qırmızı soğan – 25 qr

§ Qarağat – 30 qr

§ Meyvə turşusu – 15 qr

§ Limon – 10 qr

§ Mərzə qurusu – 5 qr

§ Zəncəfil – 1 qr

§ Sarıkök – 0,1 qr

§ Duz – 4 qr

§ İstiot – 0,05 qr

HAZIRLANMASI:

Təmizlənmiş ördəyin xırda tükləri alovda ütülür, 4-5 saat duzlu suda saxlanılır, yuyulur, təmizlənir. Duz, istiot, sarıkök, meyvə turşusu, ərinmiş kərə yağından qarışıq hazırlanır. Bu qarışıq ördəyin içərisinə və üzərinə çəkilir. Bir neçə saat sərin yerdə saxlanılır. Qalan qarışığa xırda doğranmış soğan, sürtkəcdən keçirilmiş zəncəfil, qarağat, mərzə qurusu əlavə edilir, qarışdırılır. Hazırlanmış qarışıq ördəyin içərisinə doldurulur və buxarda bişirilir. Bişdikdən sonra 10 dəqiqə müddətində 180°C-də sobada qızardılır. Içi doldurulmuş çöl ördəyinin ümumi bişmə müddəti 50-60 dəqiqə çəkir. Süfrəyə verilərkən ördəklər yarı bölünür, içərisi bütöv çıxarılır, boşqaba qoyulur, yanına doğranmış tikələr düzülür, üzəri limon və göyərti ilə bəzənərək süfrəyə verilir. Bu mütəncəm həm ayrıca, həm də plov və çilovlarla yeyilir.

“Ədəbiyyat və incəsənət”

(12.08.2024)