Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Toyuq döyməsinin hazırlanma qaydasını təqdim edəcəyik.

DÜSTUR

§ Toyuq əti – 150 qr

§ Ağ çörək – 10 qr

§ Soğan – 10 qr

§ Süd – 20 ml

§ Kərə yağı – 35 qr

§ Üyüdülmüş badam – 18 qr

§ Zəncəfil – 1 qr

§ Mərzə qurusu – 1 qr

§ Duz – 4 qr

§ İstiot – 0,05 qr

HAZIRLANMASI:

Toyuğun yumşaq əti xırdalanır, duz, istiot, zəncəfil, süddə isladılmış, sıxılmış çörək, doğranmış soğan vurulur və qiymə hazırlanır. Bir az da mərzə qurusu əlavə olunur. Qiymə yaxşıca qarışdırılır və döyülür. Hər paya 3 ədəd (60 qr) olmaqla kündələr hazırlanır, yastılanır. Üyüdülmüş badamda urvalanır, orta istilikdə hər iki tərəfi qızardılır. 180°C-də 5-6 dəqiqə müddətində sobada saxlanır. Müxtəlif növ düyü, makaron, tərəvəz, meyvədən hazırlanmış qarnirlərlə boşqaba düzülür, bəzənir və süfrəyə verilir. Bişmə müddəti 20 dəqiqədir. Bu xörək hinduşka, qaz, ev, çöl ördəyindən və s. hazırlana bilər. Bu isə aşpazın təcrübəsindən asılıdır.

Nuş olsun!

“Ədəbiyyat və incəsənət”

(31.07.2024)