Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Ağlobyalı balıq mütəncəminin hazırlanma qaydasını təqdim edəcəyik.

 DÜSTUR 

§ Sırf balığının filesi – 190 qr

§ Soğan – 50 qr

§ Kərə yağı – 35 qr

§ Bitki yağı – 20 qr

§ Ağ lobya – 50 qr

§ Alma qaxı – 18 qr

§ Armud qaxı – 18 qr

§ Ərik qaxı – 18 qr

§ Axta zoğal – 18 qr

§ Təmizlənmiş püstə – 18 qr

§ Mərzə qurusu – 1 qr

§ İstiot (dənəvər) – 0,05 qr

§ Duz – 4 qr

HAZIRLANMASI:

Balıq filesi 35-40 qramlıq tikələrə doğranır, duz, istiot vurulur, qızardılır. Ağ lobya ayrıca olaraq bişirilir, ələyə tökülüb suyu süzülür. Ayrıca bir qazanda (tavada) halqa şəklində doğranmış soğan qızardılır. Qızarana yaxın suya çəkilmiş meyvə qaxları, axta zoğal, püstə içi əlavə edilir. Bir yerdə tovlanır. Sonra üzərinə bişmiş ağ lobya əlavə edilir, ehtiyatla qarışdırılır. Qızardılmış balıq tikələri üzərinə qoyulur, qazanın ağzı bağlanır, vam odda 5 dəqiqə bişirilir, çıxarılır. Süfrəyə verəndə boşqaba çəkilir, üzərinə balıq tikələri düzülür, doğranmış göyərti səpilir. Yanında göyərti, meyvə turşusu (məti), nar dənəsi, limon verilə bilər.

Nuş olsun! 

Ədəbiyyat və incəsənət”

(23.07.2024)