Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Xoruz bozbaşının hazırlanma qaydasını təqdim edəcəyik.

DÜSTUR (nüsxə):

§ Xoruz əti – 200 qr

§ Noxud – 25 qr

§ Soğan – 20 qr

§ Kərə yağı – 20 qr

§ Yaşıl bibər – 15 qr

§ Sarı alça qurusu – 10 qr (və

ya təzə alça)

§ Quru reyhan – 3 qr

§ Sarıçiçək – 0,1 qr

§ Duz – 6 qr

§ İstiot – 0,05 qr

HAZIRLANMASI:

Xoruzun tükləri təmizləndikdən sonra mütləq xırda tükləri alovda ütülür, sonra içalatı çıxarılır, yuyulur, təmizlənir. Oynaqları kəsilir, oynaq his- sələrdən tikələrə doğranır, bir paylıq 200 qr xoruz əti olmaqla götürülür və qazana yığılır. Üzərinə 1:2 nisbətində su əlavə olunur. Odun üzərinə qoyulur və bişirilir. Qaynadıqda kəfi alınır, qazanın qapağı örtülür, vam odda bişirilir. Pətənək təmizlənir, yuyulur, ciyərlə bir yerdə müəyyən ölçüdə doğranır. Pətənək xoruz əti ilə bişirilir. Ət hazır olduqda çıxarılır, işgənəsi ələkdən sü- zülür. Eyni qazana yağ, xırda doğranmış soğan, yarıqızardılmış bibər, ət əlavə olunur. Bütün bu ərzaqlar bir yerdə tovlanır. Sonra üzərinə işgənə, əvvəlcədən isladılmış, bişirilmiş noxud, alça qurusu, duz, istiot, sarıçiçək şirəsi əlavə edilir. Vam odda bişirilir.

Kasaya çəkilir, üzərinə reyhan qurusu səpilir və süfrəyə verilir. Yanında meyvə turşusu, tərəvəz turşusu, göyərti verilə bilər.

QEYD: 

Bişmə müddəti 2-3 saat çəkə bilər. Bu müddət xoruzun yaşından asılıdır. Heyva mövsümündə heyva da vurula bilər.

Ədəbiyyat və incəsənət”

(26.04.2024)