Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə Ətli umac şorbasının hazırlanma qaydasını təqdim edəcəyik.
DÜSTUR
§ Mal əti – 78 qr
§ Quyruq – 15 qr
§ Hazır umac – 50 qr
§ Yumurta – 40 qr
§ Soğan – 25 qr
§ Noxud ləpəsi – 30 qr
§ Təzə və ya quru alça – 10 qr
§ Cəfəri – 8 qr
§ Nanə – 8 qr
§ Duz – 6 qr
§ İstiot – 0,05 qr
Xörək əlavəsi:
§ sirkə – 10 qr, abqora – 10 qr, meyvə turşuları – 20 qr, nar – 15 qr
HAZIRLANMASI:
Mal əti, quyruq, soğan ətçəkən maşından keçirilir, duz, istiot əlavə olunaraq, qiymə, qiymədən isə xırda küftəciklər hazırlanır. Əvvəlcədən umac edilir, qurudulur. Göyərtilər təmizlənir, yuyulur, qurudulur, xırda doğranır. Müxəşşər (noxud ləpəsi), təzə və ya quru alça yuyulur, təmizlənir.
Qazanda yağ qızdırılır, hazırlanmış küftəciklər yağda qızardılır, üzərinə işgənə və ya su əlavə olunur. Sonra ardıcıl olaraq ərzaqlar: noxud ləpəsi, alça, bişənə yaxın umac, göyərtilər, duz, istiot, ədviyyatlar, sonda isə qarışdırılaraq çalınmış yumurta əlavə olunur və bir az qaynadılır. Süfrəyə yanında sirkə, abqora, meyvə turşuları, narla verilə bilər. Qış yeməyi olmasına baxmayaraq, bütün fəsillərdə hazırlana bilər.
İrəvanda yaşamış Tərifə Kəngərlinskaya eyni nüsxəni “umac aşı” adlandırmışdı. Eyni nüsxədə təzə ət əvəzinə qovurma əti, noxud ləpəsi əvəzinə ərik qurusu, albuxara, cəfəri, nanə əvəzinə əvəlik istifadə et- mişdi. Umac aşına əti tikələr şəklində əlavə etmişdi.
Arzu Bağırova (Dərələyəz mahalı, Heşin kəndi) eyni nüsxəni “umac aşı” adlandırmışdı. Eyni nüsxədə noxud ləpəsi, alça əvəzinə maş, noxud, cəfəri, nanə əvəzinə əvəlik, ələyəz istifadə etmişdi. Xörəyə yumurta əlavə etməyib.
Tariyel Səfərəliyev (Dərələyəz mahalı, Cermuk şəhəri) eyni nüsxəni “sulu umac” adlandırmışdı. Bu nüsxədə cəfəri, nanə əvəzinə əvəlik, ələyəz, əlavə olaraq qırmızı bibər istifadə etmişdi. Xörəyə mal əti, para noxud, alça əlavə etməyib.
“Ədəbiyyat və incəsənət”
(01.03.2024)
