Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Mal ətindən qurut şorbasının hazırlanma qaydasını təqdim edəcəyik. 

 DÜSTUR 

§ Mal əti – 78 qr

§ Kərə yağı – 20 qr

§ Yumru düyü – 20 qr

§ Noxud ləpəsi – 20 qr

§ Soğan – 12 qr

§ Qurut – 100 qr

§ İspanaq – 11 qr

§ Keşniş – 11 qr

§ Duz – 6 qr

§ İstiot – 0,05 qr

Xörək əlavəsi:

§ nanə – 10 qr

QEYD: Soğanla birlikdə 2-3 diş əzilmiş sarımsaq da qızardıb vurmaq olar. Bu şorbanın başqa növü ayran və quzu əti ilə bişirilir.

HAZIRLANMASI:

Mal əti xırda kub formasında doğranır. Qazana yığılır, üzərinə su əlavə olunur və bişməyə qoyulur. Qaynadıqca kəfi alınır. Qurut əvvəlcədən əzilib suda həll olunur. Noxud ləpəsi əvvəlcədən yuyulub təmizlənir, isladılır. Yumru düyü yuyulur, baş soğan xırda-xırda doğranır. Göyərtilər təmizlənir, yuyulur, qurudulur, xırda doğ- ranır. Ət yarı bişəndə noxud ləpəsi əlavə olunur. Yağ və soğan qızardılır, xörəyə əlavə olunur. Sonra düyü, duz, istiot vurulur. Bişənə yaxın qurut və göyərtilər xörəyə qatılır. Bir müddət (təxminən 5-6 dəqiqə) qaynadılır. Ocaqdan götürülür və bir az yer dəmi alır. Nanə ilə süfrəyə verilir.

“Ədəbiyyat və incəsənət”

(29.02.2024)