Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Qatıq aşının hazırlanma qaydasını təqdim edəcəyik. 

DÜSTUR:

§ Qatıq – 200 qr

§ Düyü – 20 qr

§ Şüyüd – 10 qr

§ Keşniş – 10 qr

§ İspanaq – 20 qr

§ Cəfəri – 10 qr

§ Kərəviz – 10 qr

§ Duz – 6 qr

§ İstiot – 0,05 qr

Xörək əlavəsi:

§ balqabaq çiçəyi və ya yerkökü – 5 qr

HAZIRLANMASI:

Düyü suda bişirilir, üzərinə doğranmış keşniş, şüyüd, ispanaq, cəfəri, kərəviz əlavə olunur və bişirilir. Alınmış şilə (qatı şorba) soyudulur. Şilə soyuduq- dan sonra qatıqla çalınaraq, süfrəyə verilir. Üzərinə balqabaq çiçəyi əlavə edilir, son illərdə isə balqabaq çiçəyi yerkökü ilə əvəz olunub.

Səkinə Bağırova (İrəvan şəhəri, Zəngibasar rayonu) eyni nüsxədə göstərir ki, qatıq aşının hazırlanması üçün göy soğandan başqa əksər göyərtilərdən istifadə etmək olar. Məsələn, şüyüd, keşniş, əməköməci, quşəppəyi, kərə- viz, pazı yarpağı, yarpız, nanə, təzə əvəlik və s. Bəzi hallarda isə qabağı da xırda-xırda doğrayıb əlavə etmək olar.

İradə Rizazadə (İrəvan şəhəri) eyni nüsxədə kərəviz əvəzinə dağkeşnişi, nanə, quzuqulağı, gicitkən, mərzə, göy sarımsaq istifadə edib. İradə xanım qatıq aşını toyuq işgənəsində hazırlayıb.

Gülsüm Hüseynova (Makinskaya) (İrəvan şəhəri) eyni nüsxədə kərəviz əvəzinə nanə, dağkeşnişi, ispanaq, ağ çuğundur yarpağı istifadə etmişdi. Digərlərindən fərqli olaraq, şiləni qatıqla qarışdırdıqdan sonra qaynamasına yol verməmək şərtilə isitmişdi.

Ədəbiyyat və incəsənət”

(22.02.2024)