SÖHBƏT LOKARNO KİNOFESTİVALINDAN GEDİR
Avropanın kinifestivalları içində Kann, Berlin və Venesiya ən başda getsələr belə Lokarno festivalının da öz yeri var. Və növbəti xəbərimiz Lokarno kinofestivalı barədədir.
Lokarno Beynəlxalq Film Festivalı İsveçrədə keçirilir. O, Kann, Venesiya və Berlin festivallarından sonra Avropanın dördüncü ən mötəbər kinofestivalı hesab olunur. Bu il festival avqustun 2-dən 12-dək keçiriləcək.
“Ədəbiyyat və incəsənət” portalı TASS agentliyinə istinadən xəbər verir ki, LUMA Fondunun təsisçisi və direktoru Maya Hoffman Lokarno Kinofestivalının prezidenti seçilib. O, festivalın bütün 77 illik tarixində bu vəzifədə çalışan ilk qadın kimi tarixə düşüb.
Maya Hoffmanın təyinatı ilə bağlı məlumat beynəlxalq baxış saytında yer alıb.
Festivalın Direktorlar Şurası Hoffmanın namizədliyini yekdilliklə dəstəkləyib. Bundan əvvəl prezident postunu Marko Solari tuturdu. O, 20 il film festivalına rəhbərlik edib. Qadınlar daha rəhmdil olurlar deyimi burada keçmir. Belə ki, Solari hamıya güzəştə gedən birisi idisə də, Hoffman qətiyyəti və sapıntılarla barışmazlığı ilə diqqət çəkir.
Maya Hoffman sənət kolleksiyaçısı, xeyriyyəçi, sənədli film prodüsseri, impresario və iş qadını kimi tanınır. Onun yaratdığı LUMA Fondu müasir rəssamlara dəstək göstərir.
Maya Lokarno kinofestivalını ən azı qitənin ən nüfuzlu kinofestival üçlüyünə daşımağa çalışacağını bəyan edib. Təbii ki, bu, daha çox blefdir. Amma hər halda, qadının bu iddiası alqışalayiqdir.
“Ədəbiyyat və incəsənət”
(28.07.2023)
