Münhen Beynəlxalq Film Festivalının qalibi müəyyən olunub. Tunis istehsalı “Four Daughters” sənədli filmi “Ən yaxşı beynəlxalq film” nominasiyasında baş mükafata layiq görülüb.

Oxu.az The Hollywood Reporter-a istinadən xəbər verir ki, Kauter Ben Haniyanın rejissoru olduğu ekran əsəri iki böyük qızı Liviyada İŞİD-ə qoşulmaq üçün ölkəni tərk edən tunisli ana Olfa Hamruninin hekayəsindən bəhs edir. 

Qeyd edək ki, sənədli-dram hibridinin premyerası Kannda baş tutub və burada “Ən yaxşı sənədli film” nominasiyasında “Qızıl Göz” mükafatını qazanıb.

Digər hibrid filmin rejissorları Juan Salaviza və Rene Nader Messora “The Buriti Flower” filminə görə “Ən yaxşı inkişaf etməkdə olan beynəlxalq kinorejissor” kimi “CineVision Award” mükafatını alıblar. 

Film Braziliyanın kraxo xalqı ilə sıx əməkdaşlıqda çəkilib.

Konqoəsilli belçikalı reper Balojinin uzunmetrajlı debütü olan “Omen” filmi isə “CineRebels Award” mükafatı alıb.

Henninq Bekxoffun qocalmış mədənçi və onun ekoloq qızı haqqında “Fosill” dram filmi “Fipresci” Beynəlxalq Kino Tənqidçiləri Mükafatını qazanıb.

Aki Kaurismakinin “Kuolleet lehdet” əsəri isə təxminən 58 000 ziyarətçinin səsi ilə “Festivalın Tamaşaçı Simpatiyası Mükafatı”na layiq görülüb.

“Ədəbiyyat və incəsənət”

(04.07.2023)