“AZƏRBAYCANFİLM”DƏ İŞGÜZAR GÖRÜŞ BAŞ TUTUB

Meksikanın Azərbaycandakı səfiri xanım Viktoriya Romero Cəfər Cabbarlı adına “Azərbaycanfilm” kinostudiyasının direktoru Nazim Hüseynovla görüşüb. Bu barədə 

“Azərbaycanfilm” kinostudiyasından mediaya açıqlama verilib. 

Görüşdə Meksika kinosunun Azərbaycanda, eyni zamanda Azərbaycan kino sənətinin Meksika və Latın Amerikası ölkələrində tanıdılması ilə bağlı fikir mübadiləsi aparılıb.

Azərbaycan kinosunun yaranmasının 125-ci, “Azərbaycanfilm” kinostudiyasının isə 100-cü ildönümündə yeni və klassik filmlərimizin ispan dilinə tərcümə olunaraq Meksikada nümayişi, hər iki ölkənin kino xadimlərinin qarşılıqlı görüşlərinin keçirilməsi, həmçinin Meksikanın Milli Kino İnstitutu (ImCine) ilə əməkdaşlığın qurulması qərara alınıb. 

Qarşıda duran məsələlərin növbəti mərhələsi isə müştərək filmlərin istehsalıdır. Görüşdə ümumən kino sahəsində əməkdaşlıqla bağlı reallaşa biləcək bir çox layihələrin perspektivi müzakirə olunub.

Qeyd edək ki, yaxın günlərdə ölkəmizdə Latın Amerikası ölkələrinin kino günlərinin keçirilməsi ilə bağlı məsələ gündəmdədir.

“Ədəbiyyat və incəsənət”

(18.05.2023)