Azərbaycanın Xalq artisti İrana Tağızadə vəfat edib

Azərbaycan mədəniyyətinə ağır itki baş verib. Azərbaycanın Xalq artisti, Əməkdar incəsənət xadimi, Azərbaycan Dövlət Akademik Rus Dram Teatrının rejissoru İrana Tofiq qızı Tağızadə ötən gün səhər vəfat edib.

“Ədəbiyyat və incəsənət” portalı xəbər verir ki, bununla bağlı Mədəniyyət Nazirliyi mərhumun yaxınlarına dərin hüznlə başsağlığı verib. Və rəsmi açıqlama yayaraq mərhuma Allahdan rəhmət diləyib.

Xatırladaq ki, həyatını Rus Dram Teatrı ilə bağlamış aktrisa 11 il bundan əvvəl teatrdan gedəcəyi barədə bəyanat vermişdi.

“Hələlik üç ay ərzində "Azdrama"da layihədə çalışacam. İş çox ağırdır, buraya bütün gücünü sərf etməlisən. Mənim "Karamazov qardaşları" tamaşasındakı rolum yüksək təəssürat yaradıb. Elçin Əfəndiyev məni öz pyesində görmək istəyir. "Artist" pyesi klassik formalı bir tamaşadır", - demişdi. Amma 3 aydan sonra yox, heç 11 ildən sonra da tetardan getməyə ürək eləməmiş, doğma kollektivdən ayrıla bilməmişdi. 

O əməkdar artist Firdovsi Ağakişiyevin həyat yoldaşı, görkəmli rejissor Tofiq Tağızadənin isə qızı idi.

Allah rəhmət eləsin!

“Ədəbiyyat və incəsənət”

(10.04.2023)