Aprelin 2-də Azərbaycan Dövlət Akademik Musiqili Teatrında Faiq Sücəddinov və Tamara Vəliyevanın “Mən dəyərəm min cavana” ikihissəli musiqili komediyası nümayiş olunub. Qeyd edək ki, komediya illər öncə də repertuara daxil idi, indi restovrasiyadan sonra yenidən səhnəyə yer alıb.

Olduqca gözlənilməz və maraqlı situasiyalarla zəngin səhnə əsərinin ilk nümayişindən illər keçsə də, o, yenə də öz aktuallığını itirməyib və çox böyük maraqla baxılır. Tamaşanın budəfəki nümayişində Xalq artisti, “Şöhrət” ordenli İlham Namiq Kamal və sənət ocağının digər əməkdaşları iştirak ediblər. 

Qeyd edək ki, tamaşa illər öncə görkəmli teatr və kino aktyoru, “Şöhrət” ordenlı Xalq artisti Hacıbaba Bağırovun sağlığında onun 75 illik yubileyi münasibətilə hazırlanıb. Lakin tamaşanın premyerasından 1 il öncə – 2006-cı ildə böyük sənətkarın 74 yaşında qəfil dünyasını dəyişməsi bütün planları dəyişib və 2007-ci ildə “Mən dəyərəm min cavana” onu sevənlərə bir təskinlik kimi təqdim olunub.

“Ədəbiyyat və incəsənət”

(03.04.2023)