“Ədəbiyyat və incəsənət” portalı xəbər verir Xalq artisti, aktyor Valeh Kərimovla bağlı iki məlumat var. Onunla görüş keçirilib və ona vəzifə verilib. 

Öncə görüşdən başlayaq.

Bakı Şəhər Mədəniyyət Baş İdarəsinin təşkilatçılığı ilə H.Abbasov adına Mədəniyyət Mərkəzində “Qonağımız var” layihəsi çərçıvəsində baş tutub aktyorla görüş. Maraqlı və zalı dolduran görüşdə Valeh Kərimovun həyat və yaradıcılığı haqqında məlumat verilib, rol aldığı filmlərdən videoçarxlar təqdim olunub. 

Sənətkar çıxışında həyatının yaddaqalan məqamları, aktyorluq sənətinə gəlişi və oynadığı rollardan bəhs edib.

Görüş zamanı Xalq artistləri İlham Namıq Kamal, Əli Nur, Əməkdar artist Azad Şükürov çıxış edərək, aktyorun sənətindən və yaratdığı obrazlardan danışıb, sevilən müğənnilər isə ifaları ilə tədbirə rəng qatıb. 

Sonda Xalq artisti iştirakçıları maraqlandıran sualları cavablandırıb.

İndi isə vəzifəyə keçək.

İşsizliyi ilə bağlı daim giley-güzar edən, eks mədəniyyət nazirlərini tənqid edən aktyora vəzifə verilib. O, Mingəçevir teatrında həm aktyor, həm də quruluşçu rejissor kimi çalışacaq. Artıq ilk tamaşanı hazırlayıb təhvil də verib, premyera da baş tutub.

Xatırladırıq ki, Valeh Kərimov teatrda və kinoda çoxlu sayda maraqlı obrazlar  yaratsa da, xalqın yadında "Bəxt üzüyü" filmindəki Moşu obrazı ilə daha çox qalıb, daha çox sevilib.

Şəkildə: Görüşdən fraqment

“Ədəbiyyat və incəsənət”

(31.03.2023)