“Ədəbiyyat və incəsənət” portalı yazıçı Əyyub Qiyasın təqdimatında Azərbaycan aktyorlarının həyatından maraqlı anları təqdim edir. İlk olaraq sizləri tanınmış, sevilən aktyor, xalq artisti Fəxrəddin Manafovun (1955) xatirələri ilə tanış edirik.

              Bir çılğın operator

Çəkiliş prosesi çox mürəkkəb və maraqlı olur. Çünki meydançada müxtəlif peşə sahibləri işləyir və bütün diqqət təbii ki, aktyor üzərinə yönəlir. Bir neçə-əhvalat danışım…

Demək, bir dəfə çəkilişdə operatoru kimsə çox əsəbiləşdirmişdi. Adam yerə-göyə sığışmırdı. Səsini almışdı başına:

– Bu dəqiqə buraları alt-üst edərəm! – deyib çığırırdı.

Axırda Rasim Ocaqov dözmədi:

– Yaxşı da, başa düşdük, kamera əlindədir, uzağı bir dublda Fəxrəddini tərsinə çəkərsən, buralar alt-üst düşər, sən də arzuna çatarsan…

 Və bir özündənmüştəbeh aktyor

Kinoya təzə çəkilən vaxtlarım idi, yeni filmə çəkilirdim. Bizim məşhur aktyorlardan biri çəkiliş meydançasından kənarda, sərin bir yerdə ayağını ayağı üstə aşırıb, oturmuşdu. Mənim epizodum bitəndən sonra su içmək üçün qan-tər içində qaçaraq, həmin məşhurun yanına gəldim. Adam məni görəndə:

– Hə, cavan oğlan, orda işlər necə gedir? – xəbər aldı.

Mən də su içə-içə:

– Nə bilim, – cavab verdim, – Rasim Ocaqov deyir ki, bu gün mənə qədər çəkilən yerlərin hamısı zibildir.

Adam qaşlarını çatıb mənə baxdı:

– Deyəsən axı, bu gün səhərdən məni çəkiblər!

İkimiz də güldük…