Könül, “Ədəbiyyat və incəsənət”
Bu gün cümə, sabah şənbə, birigün bazar. Yox, təqvimi sadalamıram, Rus Dram Teatrının bu üç gündə verəcəyi tamaşalar barədə söz açmaq istəyirəm.
Əminəm ki, teatrsevərlər gərgin iş həftəsindən sonra mütləq bu gözəl məkana gedib bu 3 gözəl tamaşanı seyr edəcəklər.
19 APREL
Öncə Azərbaycan ədəbiyyatında şəxsən mənim ən çox sevdiyim hekayə olan “Mən, sən, o və telefon” hekayəsi əsasında hazırlanan eyniadlı tamaşadan başlayaq. Yəqin dərhal duydunuz ki, söhbət Xalq yazıçısı Anarın o məşhur hekayəsindən gedir.
Tamaşanın premyerası 2022-ci il oktyabrın 7-8-də olub.
Tamaşaya quruluş vermək üçün Sankt-Peterburqdan soydaşımız – istedadlı rejissor, Rusiya Dövlət Səhnə Sənəti İnstitutunun məzunu, artıq Azərbaycanda, Rusiyada, Qazaxıstanda tamaşalar qoymuş Ərşad Ələkbərov dəvət olunub. Bu tamaşanın quruluşçu rəssamı Kristina Danilinadır (Rusiya).
Hekayə kimi, tamaşa da telefonun baş qəhrəmanlar arasında birləşdirici halqa olduğu hadisədən bəhs edir. Rüstəmlə Mədinənin sevgi hekayəsi bu telefonun ətrafında cərəyan edir. Ancaq sonradan başqa bir aşiq personaj - Seymur əlavə edildikdə, hər şey daha da qarışıq olur. Bu sevgi üçbucağı iştirakçılardan ikisinin eyni şəxs olması ilə diqqəti çəkir. Mədinə ikisindən hansını seçəcək?
20 APREL
“Artistin taleyi”
Azərbaycan dramaturqu, Xalq yazıçısı
Elçinin pyesi əsasında hazırlanan tamaşanın premyerası 2016-cı il mayın 20-də olub. Quruluşçu rejissor Azərbaycanın Xalq artisti İranə Tağızadədir.
Azərbaycan teatr sənəti tarixinə adı qızıl hərflərlə yazılan aktyor Ərəblinskinin faciəli və sirli taleyi dramaturq və rejissor İranə Tağızadə tərəfindən ətraflı tədqiq olunur. Onun müəmmalı şəraitdə ölümünün səbəblərinin üstü hələ də açılmayıb. Lakin bununla bağlı şayiələr, əfsanələr, variantlar çoxdur.
21 APREL
“Afina axşamları”
Petr Qladilinin ikipərdəli lirik komediyasının premyerası 2016-cı il yanvarın 17-də olub. Quruluşçu rejissor Azərbaycanın Xalq artisti Aleksandr Şarovskidir.
Pyesin süjeti ailənin atası Boris Oleqoviçlə onun qızı, pianoçu Nataşa arasında ixtilafa toxunur. Baxışların ziddiyyətini Nataşanın nənəsi – knyaginya Rastopçina özünəməxsus tərzdə aradan qaldırır.
Qapaq şəklində: “Mən, sən, o və telefon” tamaşasından səhnə.
“Ədəbiyyat və incəsənət”
(19.04.2024)
