Könül, “Ədəbiyyat və incəsənət”

Şəhid anaları. Onlar cəmiyyətin ən ali varlıqlarıdır. Sən vətən üçün canını verən övlad yetişdirə bilirsənsə, demək, burada ən azı gen və tərbiyə səndən gəlir və bu iki faktor ətraf mühitlə, təhsillə, sosiallıqla birləşir. 

Ötən gün “Park Cinema” kinoteatrlar şəbəkəsində Xalq yazıçısı Gülhüseyn Hüseynoğlunun uzaq 1944-cü ildə qələmə aldığı eyniadlı əsərin motivləri əsasında lentə alınan və şəhid analarına həsr olunmuş “Ana” filmi nümayiş olundu. 

Layihənin müəllifi Toğrul Abdullayev, rejissoru Vüsal Məmmədovdur. Filmdə Əməkdar artistlər Gülər Nəbiyeva və Firəngiz Babayeva, aktyorlar İlqar Musayev, Səyyad Məmmədov çəkiliblər.

Bəri başdan deyək ki, qəddar sovet rejiminə əyilməyən və gəncliyində “İldırım” adlı antisovet təşkilatına üzv olan ədib bu “Ana” hekayəsində də sosializm realizmi ehkamlarını alt-üst edib. Onun müharibəyə, onun gətirdiyi qan-qadaya, şəhidliyə münasibəti başqa cür olub, filmi yaradanlar da bu özəlliyi bacarıqla ekrana daşımağı bacarıblar. 

Park Cinema” kinoteatrlar şəbəkəsinin mətbuat xidmətindən məlumat aldıq ki, filmin nümayişindən əldə olunan bütün vəsait “YAŞAT” Fonduna köçürüləcək.

“YAŞAT” – şəhid ailələrinin və Azərbaycan Respublikasının ərazi bütövlüyü uğrunda yaralanmış şəxslərin dəstəklənməsi fondudur. Bu təsisatın yaradılmasında əsas məqsəd vətəndaş cəmiyyətinin təşəbbüsləri çərçivəsində dövlət tərəfindən şəhid ailələrinin və hərbi əməliyyatlar zamanı zərər çəkmiş qazilərin sosial müdafiəsi üzrə tədbirlərin həyata keçirilməsidir.

Sabah da 20 yanvardır, daha bir şəhidvermə günümüzdür. Allah bütün şəhidlərimizə rəhmət eləsin, bütün şəhid analarına isə səbr və dözüm versin!

“Ədəbiyyat və incəsənət”

(19.01.2024)