Məşhur sovet və rus aktyoru, SSRİ Xalq artisti Yuri Solomin 88 yaşında vəfat edib. 

“Əzablı yollarla” filmindəki Telegin roluna görə bu aktyor bircə gün ərzində bütün SSRİ məkanında sevilmişdi. O, uğurlu aktyor və uğursuz məmur həyatı yaşadı…

İnsult keçirən sənətçi bir neçə gün əvvəl iki ay müalicə olunduğu xəstəxanadan evə buraxılmışdı. Bu barədə “Ədəbiyyat və incəsənət” portalı RİA Novosti-yə istinadən xəbər verir. Amma evdə ikən qəfil halı pisləşib və işıqlı dünyadan köçüb. 

Yuri Solomin 1935-ci il iyunun 18-də Çitada anadan olub. 1961-ci ildən Şçepkin adına Ali Teatr Məktəbində aktyorluq sənətindən dərs deyib. O, “Zati-alilərinin adyutantı”, “Əzablı yollarla”, “TASS bəyan etməyə səlahiyyətlidir” və digər filmlərdəki rolları ilə sovet tamaşaçılarının rəğbətini qazanıb, aktyor 60-a yaxın film və serialda rol alıb. Y.Solomin 1990-1991-ci illərdə RSFSR-nin mədəniyyət naziri olub. Amma SSRİ dağılıb və o, çox erkən kreslonu tərk etməli olub.

Y.Solominlə vida mərasimi onun uzun illər bədii rəhbəri olduğu Malıy Teatrda olacaq.

“Ədəbiyyat və incəsənət”

(12.01.2023)