“Ədəbiyyat və incəsənət” portalı xəbər verir ki, Azərbaycan Ədəbiyyat Fondunun yeni loqosu təsdiqlənmişdir. Loqoda tünd göy rəngdə səmaya uçuş alan kitab təsviri və Azərbaycan Ədəbiyyat Fondu yazısı yer alır. 

Azərbaycan Ədəbiyyat Fondunun Baş  direktoru Varisin portalımıza verdiyi məlumata görə, yeni loqo seçiminə 50-yə yaxın variant təqdim edilmişdir, ən yaxşı iş olaraq seçilən loqonun müəllifi tərtibatçı-rəssam Rafael Qasımovdur. 

Xatırladaq ki, Azərbaycan Ədəbiyyat Fondu ədəbiyyatımızın beynəlxalq miqyasda təmsil olunmasına, xarici ölkələrdə azərbaycanlı müəlliflərin kitablarının nəşrinə, festival və müsabiqələrdə iştirakına dəstək olan, ədəbiyyat festivallarının və forumlarının keçirilməsinə, yazarların maddi şəraitlərinin yaxşılaşdırılmasına xidmət edən bir qurumdur.

Azərbaycan Yazıçılar Birliyi Ədəbiyyat Fondu 1936-cü ildə yaradılıb, onun ilk rəhbəri həmin dövrdə Azərbaycan Yazıçılar İttifaqına sədrlik edən Məmmədkazım Ələkbərzadə olub.

“Ədəbiyyat və incəsənət”

(26.05.2023)