Beynəlxalq Türk Mədəniyyəti və İrsi Fondunun prezidenti Günay Əfəndiyeva Qazaxıstanda Beynəlxalq Türk Akademiyasının prezidenti Şahin Mustafayev ilə görüşüb.

Fonddan bildirilib ki, görüşdə türk xalqlarının qədim və zəngin tarixi-mədəni irsinin qorunması və təbliği istiqamətində Beynəlxalq Türk Mədəniyyəti və İrsi Fondu ilə Beynəlxalq Türk Akademiyasının qarşılıqlı fəaliyyətlərinin əhəmiyyətindən söhbət açılıb. İki türk təşkilatının birgə əməkdaşlığı çərçivəsində Azərbaycanın Ümummilli Lideri Heydər Əliyevin 100 illiyinə həsr olunmuş konfransın Qazaxıstanda uğurla keçirilməsinin ölkələrimiz arasındakı əlaqələrin inkişafına töhfə kimi vurğulanıb. Fond və akademiyanın iş birliyi ilə “Manas” kitabının nəşr edilməsi ümumtürk dastançılıq ənənələrinin yaşadılması və müasir dövrdə daha anlaşıqlı dildə çatdırılması yönündə önəmli layihə kimi qiymətləndirilib.

Görüşdə iki qurum arasında yaxın gələcəkdə həyata keçirilməsi planlaşdırılan birgə layihələrin perspektivləri müzakirə olunub.

“Ədəbiyyat və incəsənət”

(10.05.2023)