Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və təşkilatçılığı ilə Azərbaycanın mədəniyyəti, incəsənəti, ədəbiyyatı və tarixinə aid mövzuların Özbəkistan ali məktəblərinin tədris proqramlarına salınması layihəsi çərçivəsində akademik Nizami Cəfərov Nizami adına Daşkənd Dövlət Pedaqoji Universitetinin tələbələrinə Azərbaycan dilində mühazirələr oxuyub. 

“Ədəbiyyat və incəsənət” portalı Mədəniyyət Mərkəzinə istinadən xəbər verir ki, mühazirədən əvvəl tarix və filologiya fakültələrində olan azərbaycanlı alim  fakültələrdə tədrisin təşkili ilə tanış olub, müəllim heyəti ilə görüşüb, müzakirə və fikir mübadiləsi həyata keçirib. Fakültə rəhbərləri universitetdə təhsil alan tələbələrin Azərbaycan ədəbiyyatı, mədəniyyəti, adət-ənənələri ilə dərindən maraqlandıqlarını diqqətə çatdırıblar. 

Nizami Cəfərov da çalışdığı ali təhsil ocaqları haqqında söhbət açaraq, gənclərin elmə, biliyə olan münasibətlərini müsbət hal kimi dəyərləndirib. Daha sonra tələbələr akademik Nizami Cəfərovun Azərbaycan ədəbiyyatı və tarixi ilə bağlı ilk mühazirələrini dinləyiblər. 

Azərbaycanlı aliminin Nizami adına Daşkənd Dövlət Pedaqoji Universitetindəki mühazirələri iki gün davam edib.

Onu da qeyd edək ki, Nizami Cəfərovla bərabər Bakı Dövlət Universitetinin Arxeologiya və Etnoqrafiya kafedrasının müdiri, dosent Kərəm Məmmədov da tədbirlərdə iştirak edib. 

Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və təşkilatçılığı ilə Azərbaycanın mədəniyyəti, incəsənəti, ədəbiyyatı və tarixinə aid mövzuların Özbəkistan ali məktəblərinin tədris proqramlarına salınması və azərbaycanlı alimlərin Özbəkistan ali məktəblərində mühazirə oxuması layihəsi çərçivəsində işlərin növbəti tədris ilində də aparılması planlaşdırılır. 

“Ədəbiyyat və incəsənət”

(10.05.2023)