“Ədəbiyyat və incəsənət” portalının əməkdaşı Aida Eyvazlının Qazaxıstandan reportajı
Qazaxıstanın paytaxtı Nursultan şəhərində keçirilən Dünya ənənəvi din liderlərinin VII Qurultayında iştirak edən Qafqaz Müsəlmanları Dini İdarəsinin sədri Şeyx Allahşükür Paşazadə tədbirə Azərbaycandakı dini konfensiyaların rəhbərləri ilə birlikdə gəlib. Dini liderlərin VII Qurultayında dünyanın bir çox tanınmış din xadimləri iştirak edir. Roma kilsəsinin baş yepiskopu, Roma Papası Fransisk də Qazaxıstan Prezidenti Kasım Comərt Tokayevin dəvəti ilə tədbirdə iştirak edir.
Dünən Roma Papası və Qazaxıstan Prezidentinin ölkənin vətəndaş cəmiyyəti və diplomatik korpusunun nümayəndələri ilə görüşü olub. Azərbaycan Katolik Kilsəsinin ordinarisi, apostol prefekti Vladimir Fekete Roma Papası Fransiskin Qazaxıstana ilk gəlişindən böyük sevinc hissi keçirdiyini bildirib. O, portalımıza verdiyi aşıqlamada deyib:
“Biz bu gün dünyanı narahat edən məsələlərə öz münasibətimizi bildirmək, münaqişələrin həlli yolunu tapmaq, müxtəlif xəstəliklərin Yer üzünündə yayılmasının qarçısını almaq üçün burada toplaşmışıq. Biz istəyirik ki, dini liderlərin sözü siyasi hakimiyyətlərə təsir etsin. Onlar bizim danışdıqlarımızdan nəticə çıxararaq dünyanı məhv olmaqdan qorusunlar. Çünki əgər hər hansı bir böyük yanlışlıqdan nüvə silahına əl atılarsa, dünya və onun insanları , canlıları məhvolar. Biz istəyirik ki, dünyanın hər yerinə, o cümlədən bizim Azərbaycana, Ukraynaya da sülh və əmin-amanlıq gəlsin! Biz istəyirik ki, din mənsublarının sülhün qorunması fikirlərinə bütün siyasətçilər şərik olsunlar. Bİz istəyirik ki, dünyada sülhün, birliyin bərqərar olması üçün birlikdə dualar edək. Unutmamalıyıq ki, biz hamımız bir Yaradanın övladlarıyıq”.
Azərbaycan Katolik Kilsəsinin ordinarisi Vladimir Fekete eyni zamanda dünən bölgəmizdə ermənilərin törətdiyi son təxribata da münasibətini bildirib:
“Dini liderlər hərb işində heç bir göstərişvermə hüququna malik deyillər. Onlar ancaq ölkə prezidentlərinə, xalqlarına çağırış edə bilərlər. Siyasətçilər hər hansı bir qərar qəbul edəndə hər şeydən əvvəl başlarının üstündə Allahı düşünsünlər ki, bəs görəsən Allah bu qərarları qəbul edirmi? Qoy bütün siyasətçilər hər hansı bir qərar qəbul edəndə vicdanlarının səsini dinləsinlər. Biz də buna görə Tanrıya dua edirik”.
