Milli Məclisin İctimai birliklər və dini qurumlar komitəsinin sədri Fazil Mustafa komitənin üzvü, ilahiyyat üzrə fəlsəfə doktoru Ceyhun Məmmədovu 50 illik yubileyi ilə bağlı təbrik edib.
“Ədəbiyyat və incəsənət” portalına Komitədən verilən xəbərə görə, Komitə sədrinin təbrik məktubunda Millət vəkilinin həyat və fəaliyyətinin ən önənli hadisələrinə vurğu edilib:
“Hörmətli Ceyhun müəllim,
Sizi 50 illik əlamətdar yubileyinizlə bağlı təbrik edir, möhkəm cansağlığı, yeni uğurlar diləyirəm!
Çox şadam ki, bu ilki yubileyinizi işğaldan qurtulmuş doğma Cəbrayıla mədəniyyətin, insanlığın dönüşü, Böyük Qayıdışın icra olunması, bir sözlə, azadlıqdan abadlığa, böyük quruculuğa keçidin təntənəsi, sevinci, qüruru içində keçirirsiniz.
Siz ixtisasınız üzrə bir sıra önəmli vəzifələrdə çalışmış, həmçinin Dini Qurumlarla İş üzrə Dövlət Komitəsi Dinşünaslıq ekspertizası, ictimai məsələlər və analitik təhsil şöbəsinin müdiri, “Dövlət və Din” ictimai fikir toplusunun redaktoru, Prezident Administrasiyasında Millətlərarası münasibətlər, multikulturalizm və dini məsələlər şöbəsinin böyük məsləhətçi vəzifələrində çalışmış, Azərbaycan İlahiyyat İnstitutunun rektoru olmusunuz.
VI, VII çağırış Milli Məclisin üzvü, İctimai birliklər və dini qurumlar komitəsi, Elm və təhsil komitəsinin, eləcə də, İslam Əməkdaşlıq Təşkilatına üzv dövlətlərin Parlament İttifaqının üzvü, Azərbaycan-Misir parlamentlərarası əlaqələr üzrə işçi qrupunun rəhbəri olaraq səmərəli ictimai-siyasi fəaliyyətinizlə seçilirsiniz.
Sizi 50 illik yubileyinizlə bağlı bir daha təbrik edir, möhkəm cansağlığı, iş avandlığı diləyirəm”!
“Ədəbiyyat və incəsənət”
(29.01.2025)
