Milli Məclisin İctimai birliklər və Dini Qurumlar Komitəsinin sədri Fazil Mustafa 17 Noyabr - Milli Dirçəliş Günü ilə bağlı təbrik ismarıcı ünvanlayıb. “Ədəbiyyat və incəsənət” portalı xəbər verir ki, ismarıcda bu günün anlamına özəl vurğular edilib:
“Bu gün Azərbaycan Respublikasında Milli Dirçəliş Günü - dövlət bayramıdır.
Bu bayram öz qaynağını 1988-ci ilin son aylarında Bakıda baş vermiş tarixi hadisələrdən alır (17 noyabr - 05 dekabr 1988-ci il). Keçmiş SSRİ rəhbərliyinin Qarabağ məsələsi ətrafında apardığı anti-Azərbaycan siyasəti nəticəsində XX yüzilin 80-ci illərinin sonunda respublikamızda anti-sovet xalq hərəkatı təşəkkül tapdı. - 17 noyabr 1988-ci ildə Bakının əsas meydanı sayılan Azadlıq (keçmiş Lenin) meydanında baş verən uzunmüddətli və ümumxalq mitinqləri ciddi nəticələrə gətirib çıxardı.
Beləliklə, sözügedən dönəmdəki və gündəki hadisələr çağdaş milli-azadlıq hərəkatı tarixinə qızıl hərflərlə yazılaraq, respublikamızın istiqlaliyyət qazanmasında əsas amilə çevrildi.
Çox şadıq ki, son dörd il içində digər bayramlarımız kimi 17 Noyabr - Milli Dirçəliş Gününü də əsl bayram dadına, ovqatında keçirə bilirik. Müzəffər Ali Baş Komandan, Prezident İlham Əliyevin rəhbərliyi ilə, dövlət-xalq birliyi zəminində Qarabağ və Şərqi Zəngəzurun düşmənin 30 illik işğalından qurtulması əsl milli dirçəliş hadisəsi olaraq xarakterizə oluna bilər. Özəlliklə, ötən ilin sentyabrındakı antiterror tədbirləri nəticəsində terrorçuların ağ bayraq qaldırması və suverenliyimizin tam bərpası çox böyük tarixi hadisədir!
Müzəffər Ali Baş Komandanın 15 oktyabr 2023-cü ildə Xankəndi, Xocalı, Əsgəran, Ağdərə və digər yaşayış məntəqələrimizdə qutsal bayrağımızı dalğalandırması xalqımıza əbədi qürur, sevinc və fərəh bəxş edib!
Bəli, 36 il öncə meydanda bir araya gəlmək, kütləvi izdiham yaratmaq, birlikdə Sovet rejiminə etiraz etmək milli dirçəlişimizin komponenti sayılır. Nəticədə Azərbaycan dövləti adlanan müqəddəs dəyərimiz meydana çıxdı. İndi bunlar tarixdir. Özəlliklə, ərazi bütövlüyümüz, suverenliyimiz bərpa olunduqdan sonra başqa dirçəlişə ehtiyacımız var:
İntellektual dirçəlişə,
Mədəni dirçəlişə!
Dirçəlişlə də iş bitmir. Dirçələndən sonra Addımlamaq da lazımdır. Yüksəlişə doğru,
Yeniliyə doğru,
Rifaha doğru…
Milli dirçəlişimizi ayrıca bir 17 Noyabr günündən çıxarıb hər günümüzün yaşam normasına çevirməliyik. - Qalib ölkə vətəndaşı belə bir dirçəlişi - yenidən dirilişi haqq edir.
Bu bayram günündə əziz şəhidlərimizin ruhu qarşısında dərin sayğılarla baş əyir, qazilərimizə möhkəm cansağlığı, ordumuzun hər bir əsgərinə, zabitinə güc-qüvvət diləyirik!
MİLLİ DİRÇƏLİŞ GÜNÜMÜZ QUTLU OLSUN”!
“Ədəbiyyat və incəsənət”
(17.11.2024)
