Bu gün Azərbaycan Mətbuat Şurasının sədri, Yazıçılar Birliyinin sədr müavini , “525-ci qəzet”in baş redaktoru, tanınmış ictimai xadim Rəşad Məcidin 60 yaşı tamam olur (21.08.1964-cü il, Ağcabədi).
Vl çağırış Milli Məclisin Mədəniyyət Komitəsinin sədri Fazil Mustafa Rəşad Məcidi yubileyi ilə bağlı təbrik edib.
“Ədəbiyyat və incəsənət” portalı Təbrik məktubunun mətnini təqdim edir:
“Hörmətli Rəşad müəllim,
Sizi 60 illik yubileyinizlə bağlı təbrik edir, möhkəm cansağlığı, yaradıcılıqda və ictimai fəaliyyətdə yeni uğurlar diləyirəm!
Siz Bakı Dövlət Universitetinin Jurnalistika fakültəsinin ünlü məzunlarındansınız və jurnalistika sahəsində uzunmüddətli, səmərəli fəaliyyətinizlə seçilirsiniz.
Əmək fəaliyyətinə 1985-ci ildə "Elm və həyat" jurnalında başlamış, 1990-cı ilədək həmin jurnalda çalışmısınız.
1990–1991-ci illərdə isə Azərbaycan Bədii Tərcümə və Ədəbi Əlaqələr Mərkəzinin sədr müavini vəzifəsini daşımısınız.
1991–1992-ci illərdə öncə "Ədalət" və "Azərbaycan" qəzetlərində baş redaktorun birinci müavini olmuş,
1992-ci ildə isə "525-ci qəzet"i təsis etmisiniz. Uzun illərdir, bu ünlü mətbu orqanın baş redaktorusunuz.
1993-cü ildə "Azərmətbuatyayımı" İstehsalat Birliyinin rəisi vəzifəsində çalışmısınız.
1994–1995-ci illərdə Azərbaycan Tərcümə Mərkəzində məsul katib vəzifəsini daşımısınız.
2003-cü il martın 15-də keçirilən Azərbaycan Mətbuat Şurasının təsis Qurultayından (Azərbaycan Jurnalistlərinin I Qurultayı) bəri, hər Qurultayda İdarə Heyətinin üzvü, Azərbaycan jurnalistlərinin 24 sentyabr 2022-ci ildə keçirilmiş VIII qurultayında isə Mətbuat Şurasının sədri seçilmisiniz.
Azərbaycan Prezidentinin Sərəncamına əsasən,
2016 və 2020-ci illərdə Prezident yanında Əfv Məsələləri Komissiyasının üzvü olmusunuz.
Müxtəlif illərdə Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasında təmsil olunmusunuz.
2004-cü ildə Azərbaycan Yazıçılarının XI qurultayında Birliyin Gənclərlə iş üzrə katibi seçilmisiniz;
2021-ci ilin iyul ayından isə Birlik sədrinin müavinisiniz.
Qardaş Türkiyə, Qazaxıstan, Qırğızıstan, Türkmənistan, Özbəkistan və KKTC-də, habelə
ABŞ, Almaniya, Belçika, Böyük Britaniya, Fransa, Güney Koreya, Küveyt, İtaliya, Polşa, Rusiya, Ukrayna, Yunanıstan və b. ölkələrdə mətbuatla, ədəbiyyatla bağlı bir çox tədbirin iştirakçısı olmuş, dəfələrlə Avropa Şurasının Parlament Assambleyasının iclas və toplantılarında mətbuat nümayəndəsi kimi Azərbaycanı təmsil etmisiniz.
Siz bir sıra mükafatlara təltif edilmiş, Prezidentin bu il 20 avqust tarixli Sərəncamı ilə media sahəsində uzunmüddətli səmərəli fəaliyyətinizə görə 2-ci dərəcəli “Vətənə xidmətə görə” ordeninə layiq görülmüsünüz.
Sizi yubileyinizlə, yüksək ordenə layiq görülməyinizlə, ictimai və yaradıcılıq uğurlarınızla bağlı bir daha təbrik edir, ən xoş diləklərimi yetirirəm.”
“Ədəbiyyat və incəsənət”
(21.08.2024)
