Milli Məclisin Mədəniyyət Komitəsinin sədri Fazil Mustafa Moskvada yaşayıb-yaradan azərbaycanlı şair-publisist, tərcüməçi, AYB Moskva bölməsinin məsul katibi Afaq Şıxlını 55 illik yubileyi ilə bağlı təbrik edib.

“Ədəbiyyat və incəsənət” portalı xəbər verir ki, Komitə sədrinin yubilyara ünvanladığı məktubda deyilir:

“Hörmətli Afaq xanım,

Sizi 55 illik əlamətdar yubileyinizlə bağlı təbrik edir, ictimai və yaradıcı fəaliyyətinizdə yeni uğurlar diləyirəm!

Siz əslən Qazaxn İkinci Şıxlı kəndindənsiniz; el-obanın zəngin poeziya, ümumən ədəbiyyat-mədəniyyət gələnəyi sizin həyat və fəaliyyətinizə də təsirsiz ötüşməyib. İxtisasca həkim olsanız da, toplumumuz sizi daha çox, şair-publisist, tərcüməçi kimi tanıyır. Təsadüfi deyil ki, siz, uzun illərdir yaşadığınız Moskva şəhərində, Rusiyada və Türk dünyasında bir çox ədəbi qurumun, o cümlədən Azərbaycan Yazıçılar və Jurnalistlər birliklərinin üzvü, DGTYB Məsləhət Şurasının üzvü, 2015-ci ilin yanvar ayından AYB Moskva bölməsinin məsul katibisiniz.

Şeirləriniz bir neçə dilə çevrilərək, ayrı-ayrı ölkələrdə antologiya, qəzet, jurnal və saytlarda yayınlanıb.

Müəllifi, həmmüəllifi, tərtibçisi olduğunuz 15-ə yaxın kitab gün üzü görüb. – Onlara örnək olaraq, “Qəlbimin dedikləri” (2003), “Sevərsənmi?” (2005), “Məndən uzaqda” (2008), “Səni düşünürəm” (2011), “Ömrümün beşinci fəsli” (2013), “Dostlarım, bana da bahar gönderin!” (Türkiyə, 2013), “Yeddidən biri” (2014), “Bədii tərcümələr” (2014), “Sənə demədiklərim” (2014) adlı kitablarınızı xatırlada bilərik.

Sizi yaradıcılıq uğurlarınız və əlamətdar yubileyinizlə bağlı Mədəniyyət Komitəsi adından bir daha təbrik edir, ən xoş diləklərimizi yetirirəm”!

“Ədəbiyyat və incəsənət”

(25.06.2024)