Redaksiyamızın poçtundan dərc etdiyimiz növbəti məktub bugünkü tarixi günlə - Ümummilli lider Heydər Əliyevin anadan olmasının 101-ci ildönümü ilə bağlıdır. Müəllifi ADPU-nun Şəki filalının V kurs tələbəsi Sevda Verdiyevadır.
Heydər Əliyev və Azərbaycan gəncliyi
Tarix göstərir ki, yalnız güclü və uzaqgörən liderləri olan xalqlar azadlığa qovuşa bilirlər. Xalqı qələbəyə ancaq güclü iradəyə sahib, qətiyyətli qərarlar qəbul edən, milli maraqları hər şeydən üstün tutan lider apara bilər.
Ş.İ.Xətaidən sonra xalqımızın 500 illik tarixində belə bir lider Heydər Əliyev olub. Məncə, Heydər Əliyev Bozqurd kimi Tanrı tərəfindən göndərilmiş rəhbər və xilaskar idi. Hər dəfə ölkə zor duruma düşəndə ortaya çıxmış, xalqı və məmləkəti xilas etmişdir. Təsadüfi deyil ki, böyük qırğız yazıçısı Çingiz Aytmatov onu həm tarixi, həm də əfsanəvi şəxsiyyət adlandırmışdı.
Qorxmaz, cəsarətli, qranit kimi möhkəm iradəyə malik Heydər Əliyevin hakimiyyətə gəlişi ilə uzun illərin sükunəti hərəkətə gəlmiş, türk düşüncəsi silkələnmiş, beynəlmiləlçilikdən milliliyə dönüş başlamış, simasızlaşmağa gedən millət oyanmış, milli düşüncənin formalaşmasında möhtəşəm işlər görülmüş, milli dövlətçilik arzuları və hissləri güclənmişdi.
Tarixin gedişini həssaslıqla izləyən H.Əliyev müəyyən taktiki gedişlərlə Moskvanın gözünü qamaşdırır, mənsub olduğu xalq üçün strateji planlarını həyata keçirirdi. Sovet imperiyasının məhvə məhkum olduğunu hamıdan yaxşı görən ulu öndər siyasi imkanlarından və nüfuzundan gələcək müstəqil Azərbaycan dövlətçiliyinin qurulmasına zəmin yaradan faktorların təmin edilməsi naminə istifadə etməyə çalışırdı. Belə faktorlardan biri də müstəqil Azərbaycanın parlaq gələcəyini təmin edəcək savadlı, bilikli, intelektual qabiliyyəti yüksək olan gənclərin yetişdirilməsi idi.
Ona görə də ulu öndər hakimiyyətə gəldiyi gündən gənclərin himayədarı kimi çıxış etmiş, həmişə Azərbaycan gəncliyinin gələcəyini düşünmüşdür. O, yaxşı bilirdi ki, gəncliyə etinasız yanaşmaq gələcəyi təhlükəyə atmaq deməkdir. Çünki gənclik gələcəkdir, gələcəyin təminatıdır. Tarixə nəzər saldıqda da görürük ki, gəncliyə dəyər verən, onun inkişafına sərmayə qoyan dövlətlər nəinki məhv olmaq təhlükəsindən xilas olub, zaman keçdikcə daha da güclənib, inkişaf edib.
Ulu öndər respublika rəhbərliyinə gəldiyi ilk illərdən sağlam düşüncəli yeni nəslin yetişdirilməsi sahəsində böyük işlər görmüşdür. Mənim qələmimin gücü Heydər Əliyevin gənclər siyasətindən təfsilatı ilə bəhs etməyə yetməz. Lakin oxuduqlarımdan və gördüklərimdən belə qənaətə gəlirəm ki, milli mənəvi dəyərlərimizin qorunmasında gənclərin rolunun artırılması, gənc nəslin tarixi köklərimizə bağlı və vətənpərvər ruhda tərbiyə olunması, onların təşkilatlanmas elmi, intellektual potensialının gücləndirilməsi, dövlət idarəçiliyində rollarının artırılması, beynəlxalq aləmə inteqrasiyanın yaratdığı imkanlardan maksimum səviyyədə yararlanmalarının təmin olunması bu siyasətin əsas istiqamətləri olub.
Ümummilli lider Heydər Əliyev hakimiyyətinin birinci dövründə daha çox gənclərin bir kadr kimi yetişməsinə, güclü kadr potensialının yaradılmasına çalışırdı. Məhz onun şəxsi müdaxiləsi və qayğısı ilə ötən əsrin 70-ci illərindən başlayaraq ölkəmizdə təhsil müəssisələrinin zəngin şəbəkəsi yaradılmış, azərbaycanlı gənclər təhsil almaq üçün kütləvi şəkildə keçmiş SSRİ-nin ali məktəblərinə göndərilməyə başlanmışdı. Bakıdakı ali hərbi məktəblərə qəbul olunan gənclərin sırasında azərbaycanlıların sayı intensiv şəkildə artmış, bu sahədə milliləşdirmə prosesinə start verilmiş və Cəmşid Naxçıvanski adına hərbi lisey yaradılmışdı. Həmin illərdə ümummilli liderin təşəbbüsü ilə ölkədə ali təhsil müəssisələrinin sayı 12-dən 17-yə, burada təhsil alan tələbələrin sayı isə 70 mindən 100 minə çatmışdır.
H.Əliyev sovet dönəmindəki rəhbərliyi dövründə 15 mindən çox gənci keçmiş ittifaqın 50-dən artıq şəhərinin 170 ali təhsil müəssisəsində 250-yə yaxın ixtisasa yiyələnmək üçün həmin ali məktəblərinə təhsil almağa göndərmiş, onların yüksək ixtisaslı və peşəkar kadr kimi hazırlanmasına nail olmuşdu.
Hələ 1975-ci ildə o, Azərbaycandan kənarda təhsil almağa göndərilən tələbələrlə görüşündə qeyd etmişdi: “Siz bu əsrin axırıncı onilliklərində və gələn əsrin əvvəllərində işləyəcəksiniz. O zaman elmi-texniki tərəqqi üfüqlərinin necə cazibədar olacağını bu gün təsəvvür etmək mümkündür. Sabahkı gün sizə yeni, yüksək tələblər verəcəkdir. Əgər mütəxəssis həqiqətən yaradıcı şəxsiyyətdirsə, o, sadəcə olaraq, zamanla ayaqlaşmalı deyil, həmişə zamanı bir qədər qabaqlamalıdır. Bu isə o deməkdir ki, daim öyrənmək lazımdır, buna görə də bilik, bacarıq, vərdiş bünövrəsi möhkəm olmalıdır”.
Mən gənc nəslin geniş fəaliyyət meydanına çıxarılmasında ulu öndərin həyata keçirdiyi möhtəşəm işləri xatırlayarkən riqqətə gəlirəm. Bu günün prizmasından baxdıqda onun gördüyü işlərin dövlət quruculuğundakı əvəzsiz rolunu daha aydın və qabarıq görürük. Zənn edirəm ki, əgər ulu öndər Heydər Əliyevin hələ respublikamıza birinci rəhbərliyi dövründə gənclərdə milli şüurun oyanışı istiqamətində istər açıq, istərsə də gizli şəraitdə görülən işlər olmasaydı, ötən əsrin sonlarında Azərbaycanın müstəqil dövlət kimi mövcudluğundan danışmaq çətin olardı.
Ulu öndər müstəqil Azərbaycana rəhbərliyi dövründə artıq gəncləri dövlətin idarəedilməsində aparıcı qüvvə, müstəqilliyin qarantı kimi görürdü. O, xalqın tələbi ilə ikinci dəfə hakimiyyətə qayıtdıqdan sonra da gəncliyin inkişafını diqqətdə saxlamış, gənclərlə iş dövlət siyasətinin əsas istiqmətlərindən biri olmuşdur. H.Əliyevin yetişməkdə olan gənc nəslə böyük inamı vardı. Çıxışlarının birində öz inamını belə ifadə etmişdi: “İnanıram ki, gənc Azərbaycan dövləti məhz bu saf əqidəli, dərin bilikli, geniş dünyagörüşlü, mətin və dönməz gənclərimizin fəaliyyəti sayəsində öz müstəqilliyini əzmlə qoruyacaq, dünyanın ən qüdrətli dövlətlərindən birinə çevriləcəkdir... Biz müstəqil Azərbaycanın taleyini gələcəkdə sizə tapşıracağıq. Ona görə də Azərbaycanı, Azərbaycan dövlətini yaşatmaq, inkişaf etdirmək üçün hazır olun!"
Bunun üçün ümummilli liderimiz gənclərin milli-mənəvi dəyərlərə yiyələnmələri, dövlətinə və bayrağına sevdalı, vətənpərvər ruhda yetişmələri, mükəmməl təhsil almaları, həyatı dərindən öyrənmələri və dünyada gedən prosesləri bilmələri üçün səy göstərir, onlara diqqət və qayğını daha da gücləndirirdi. H.Əliyevin gənclərlə müntəzəm görüşləri, ölkə gənclərinin forumlarının keçirilməsi, Gənclər və İdman Nazirliyinin yaradılması, gənclər gününün təsis olunması, gənclərin sosial, iqtisadi və s. problemlərinin həllinə yönəldilən, onların öz qabiliyyətlərinin inkişaf etdirmələrinə kömək edən fərman, sərəncam və dövlət proqramlarının qəbul edilməsi, gənclər siyasətinin dövlət siyasətinin tərkib hissəsinə çevrilməsi və s. göstərilən diqqət və qayğıya nümunə ola bilər.
H.Əliyevin gəncliyə verdiyi qiyməti dünya ölkələrinin heç birində heç bir dövlət başçısı öz ölkəsinin gəncliyinə verməyib. Bu gün ölkəmizdə hərbi, təhsil, siyasi, iqtisadi, idman və digər bütün sahələrdə təmsil olunan gənclərin qazandığı uğurların, nailiyyətlərin hamısı ümummilli lider H.Əliyevin adı ilə bağlıdır.
Heydər Əliyev ancaq azərbaycançılıq ideologiyası əsasında formalaşdırdığı gənclər siyasəti ilə könlümüzdə taxt qurmamış, həm də öz şəxsiyyəti, fəaliyyəti, məsləhət və tövsiyələri ilə hər birimiz üçün nümunə olmuş, idealımıza çevrilmişdir. Şəxsən mən H.Əliyevi məşhur hekayənin qəhrəmanı Dankoya bənzədirəm. Danko qaranlıqda çaşıb qalmış xalqı azadlığa qovuşdurmaq üçün ürəyini məşəl etdiyi kimi H.Əliyev də “Mən həyatımın qalan hissəsini də xalqıma bağışlayıram”, - deyərək keçən əsrin əvvəlindən AXC-nin başlatdığı istiqlal savaşını əsrin sonlarında müstəqil Azərbaycan dövləti kimi əzəmətli reallığa qovuşdurmuşdur.
Tam əminliklə deyə bilərəm ki, ulu öndər H.Əliyevin gəncliyə və gənclərə diqqət və qayğısı indi yeni mərhələyə qədəm qoyub. Ölkəmizdə gənc nəslin problemlərinin həlli, onların cəmiyyət həyatında layiqli təbəqə kimi iştirakının təmin olunması, milli adət-ənənələrə, saf dəyərlərə bağlılığı üçün dövlət səviyyəsində bütün zəruri tədbirlər həyata keçirilir. Əsası ümummilli lider tərəfindən qoyulan gənclər siyasətinin Prezident İ.Əliyev tərəfindən uğurla davam etdirilməsinin nəticəsidir ki, bu gün Azərbaycan gənclərinin ölkənin ictimai-siyasi həyatında rolu günü-gündən artır, gənclərimiz bütün sahələrdə öz sözlərini deyə bilirlər.
Bəli, artıq Azərbaycanda milli-mənəvi dəyərlərə sahiblənmiş, cəsur, yüksək vətənpərvərlik hissinə, intellektual səviyyəyə, milli düşüncəyə malik gənc nəsil formalaşıb. Dövlətin gənclərə dəstək və diqqət göstərməsinin nəticəsində Azərbaycan gəncliyində öz dövlətinə, özünə, öz gücünə və istedadına inam hissi artıb.
Bunun ən bariz nümunəsi 44 günlük Vətən müharibəsində qazanılan qələbədir. Bu qələbəni bizə H.Əliyevin ölkəmizə rəhbərlik etdiyi illərdə doğulan və böyüyən, İ.Əliyevin ölkəyə rəhbərlik etdiyi dövrdə yetişən və fomalaşan gənclər bəxş etdilər. 2003-cü ildə 10-15 yaşında olan bu gənclər Vətən savaşına qatılan 25-35 yaşlı qəhrəmanlara çevrildilər, yeni tarix yazdılar.
Dövlətin diqqət və qayğısına cavab olaraq ölkəmizin gələcəyinin təminatçısı olan gənclər bütöv və müstəqil Azərbaycan naminə bütün güclərini səfərbər edir, Vətənin inkişafı üçün səylə çalışır, ölkəmizin uğurlu daxili və xarici siyasətini dəstəkləyirlər.
Tam inamla deyirəm ki, ölkəmizdə ulu öndərin gənclər siyasətinin uğurla davam etdirilməsi Azərbaycan gəncliyini daha işıqlı sabahlara aparacaqdır.
“Ədəbiyyat və incəsənət”
(10.05.2024)
