“Ədəbiyyat və incəsənət” portalının poçtuna Azərbaycan Respublikası

Milli Məclisinin Mədəniyyət Komitəsinin görkəmli şair Əli Tudənin 100 illiyi münasibətilə yazdığı mətn daxil olmuşdur. 

Mətndə deyilir:

Bu gün  Əməkdar incəsənət xadimi,  

75 illik ömrünün 50 ildən çoxunu milli poeziyamızın inkişafına həsr etmiş

görkəmli Azərbaycan şairi, 

publisist, nasir və tərcüməçi

Əli Tudənin anadan olmasının 100-cü ildönümüdür (Əli Qulu oğlu Cavadzadə; 31.01.1924, Bakı – 26.02.1996, Bakı).

Güney Azərbaycan demokratik ədəbiyyatının yaradıcılarından olan Əli Tudə, 

Təbrizdə ilk ana dili dərsliyinin müəlliflərindən biri, habelə İran tarixində ilk Milli Filarmoniyanın yaradıcısı 

(bu filarmoniyanın ilk və son müdiri) olub.

Şairin oğlu Natiq Cavadzadə onun 20 cildlik "Əsərləri"ni peşəkarlıqla nəşrə hazırlayaraq, nəfis şəkildə nəşr etdirib.

Əli Tudənin çoxşaxəli yaradıcılığında lirik əsərlər başlıca yer tutur. 

Nəsrdə də qələmini sınamış Əli Tudənin sağlığında gün üzü görmüş 30-dan çox kitabının 3-ü nəsr əsərlərindən ibarətdir. 

Şair özəlliklə Vətən mövzusunda çoxsaylı şeirlər yazıb. Vətənin birliyi, azadlıq arzusu əsas yer tutan bu şeirlərdə Güney həsrəti, istiqlal nəğmələri, azadlıq hissləri geniş şəkildə işlənib. 

Şairin şeirləri içərisində insanın sevgi duyğuları öz ülviliyi, müqəddəsliyi, tərbiyəvi özəllikləri ilə diqqət çəkir. 

Əli Tudənin uşaqlar üçün yazdığı şeirlərin də böyük tərbiyəvi önəmini vurğulamalıyıq. 

Onun yaradıcılığında ədəbiyyatşünaslıq məsələləri də diqqətdən qıraqda qalmayıb, yazdığı məqalələr ədbiyyatşünaslıq elminə verilən töhfələr hesab edilir. 

Əli Tudə mükəmməl tərcüməçilik fəaliyyəti göstərib, bir sıra əsərləri uğurla dilimizə çevirib. Onun şeirləri də bir çox xarici dilə çevrilib.

Sayğılarla anırıq.

Ruhu şad olsun!

Azərbaycan Respublikası

Milli Məclisinin Mədəniyyət Komitəsi

“Ədəbiyyat və incəsənət”

(31.01.2024)