Bəli, təbiətə qənim kəsilənlərlə bağlı xəbərləri daim izləyib paylaşacaq, oxucuları təbiəti sevməyə daim səsləyəcəyik. 

Növbəti belə xəbər gənclik şəhəri Sumqayıtla bağlıdır. Şəhərin Nəriman Nərimanov küçəsi, 5-ci mikrorayonla 45-ci məhəllə arasındakı yaşıllıq ərazidə gecəylə ağacların kəsilməsini görən sakinlər bununla 

bağlı Dövlət Ekoloji Təhlükəsizlik Xidmətinə daxil şikayət ediblər, şikayət yerində araşdırılıb.

Xidmət rəsmisi Bəhruz Məhəmmədov mediaya bildirib ki, araşdırma zamanı ərazidə 17 ədəd sağlam, təzətər ağacın qanunsuz kəsildiyi müəyyən edilib. Yaşıllıq sahəsinə xidmət göstərən Sumqayıt şəhər Yaşıllaşdırma İdarəsi tərəfindən ərazidəki ağacların mühafizəsinin düzgün təşkil olunmadığı və ağacların bir qisminin İdarə tərəfindən götürüldüyü qənaətinə gəlinib. 

Bəli, təəccüblü də olsa məhz belədir.

Faktla bağlı akt tərtib olunub. Məsələyə hüquqi qiymət verilməsi üçün toplanmış sənədlər hüquq-mühafizə orqanlarına göndərilməsi üçün hazırlanır.

Xidmət rəsmisinin sözlərinə görə, götürülmüş ağacların əvəzinə yeni ağaclar əkilib və onlara aqrotexniki qulluq göstərilməsi üçün Sumqayıt şəhər Yaşıllaşdırma İdarəsinə müvafiq göstəriş verilib.

“Ədəbiyyat və incəsənət”

(23.08.2023)