Poetik qiraət rubrikasında daimi imzalardan olan Yusif Nəğməkar bu gün “Kəlmə-kəlmə əriyirəm” deyəcək. Şeir 30 iyulda yazılıb. 

Ömür hara uçur belə?!.

Ürəksə od saçır hələ...

Zaman qurmuş mübhəm tələ --

İllər ötür bir an kimi!..

Köçə-köç sağrım teyləyir;

Yolmu yolçunu əyləyir?!.

Həyat əlvida söyləyir

Biz həyatı qanan kimi...

Ərsən, gəşt elə mənalı --

Tərif, sağlıq tam əmmalı...

Sevgilər də təmənnalı --

Bas bağrına sonan kimi...

Göymü göy bağlayacaqdı?!

Ya Yermi çağlayacaqdı?!

Ölsən, kim ağlayacaqdı

Səni doğma anan kimi?!.

Ey Nəğməkar, ötmə, kiri,

Dərdi cana kərə kürü,

Alış, kəlmə-kəlmə əri

Şam dilindən yanan kimi!..

 “Ədəbiyyat və incəsənət”

(14.08.2023)