“Ədəbiyyat və incəsənət” portalının Poetik qiraət rubrikasında bu gün gənc şair İlkin Xaliq debüt edir. “Son zəng” şeiri redaktorlarımızın seçimində təqdim edilir. 

Xatırladaq ki, İlkin mərhum şair Xaliq Oğuzun oğludur. 

Son zəng

Daha nəğmə deyil eşqin havası

Qopdu öz kökündən sevginin simi.

Səsini ucaldıb dediyin sözlər

Səslənir məktəbin son zəngi kimi.

**

Daha yağışlardan zəhləmiz gedir,

Yağışda islanıb gülmürük daha.

Az qala hər şeyi bilirik, amma

Sevgi şeirləri bilmirik, daha.

**

Açıb dirijortək qolların saat

Ayrılıq nəğməsin müşayət edir 

Gülüş sədaları qaranquş kimi

Bu soyuq yuvadan köç edib gedir. 

**

Uzaqda kimdirsə dırnaqlarını

Gəmirə-gəmirə bizlərə baxır.

Pusquya salınmış eşq  əsgər kimi

Sonuncu gülləni başına çaxır.

**

Qadası, mən həmin oğlan deyiləm,

Bəlkə sən o sənsən, bu qız o qızdı.

Bu evin pəncərə gözləri dolub,

Yox, bura soyuqdur, daha payızdı!

 “Ədəbiyyat və incəsənət”

(08.08.2023)