“Ədəbiyyat və incəsənət” portalının Poetik qiraət rubrikasında sizlərə Yusif Nəğməkarın yeni yazdığı “Bəsirət yolçusu” şeirini təqdim edirik. 

BƏSİRƏT YOLÇUSU

Yönüm məşriqdən məqribə,

Uzun həsrət yolçusuyam,

Saattək dönüb əqrəbə,

Vaxt nəfsi qət yolçusuyam.

Doğuldum dilək danda mən,

İndi mənəm hər yanda mən...

Mövlayam sözə, anda mən,

Car -- cəsarət yolçusuyam.

Yazam, yayam, payız, qışam,

Batin, zahir -- içəm, dışam,

Qançəkərə uçar quşam;

Eşq-əsarət yolçusuysm.

Səmaviyəm Göy tacımla,

Dilimdə dua açımla,

Xeyrül-əməl illacımla

Qurban kəsrət yolçusuyam.

Həm gerçəyəm, həm yuxuyam,

Həm comərdəm, həm qorxuyam,

Xalı xalıtək toxuyan

İmsak-nüsrət yolçusuyam.

Rizam cinahdan gələndi,

Əzam min ahdan gələndi...

Yazım Allahdan gələndi,

İzzət, həzrət yolçusuyam.

Nə arizəm, nə qüsuram,

Nə ariyəm, nə qüsulam,

Nə fər fəndəm, nə üsulam,

Nə basarat yolçusuyam.

Dərdim dərinlə yarıdı;

Ölüm-dirimlə yarıdı...

Üzüm özümə sarıdı --

Mən bəsirət yolçusuyam.

 “Ədəbiyyat və incəsənət”

(19.07.2023)