Gürcüstanın Gaxa.ge portalı Dövlət Tərcümə Mərkəzinin “Azərbaycan ədəbiyyatı beynəlxalq virtual aləmdə” layihəsi çərçivəsində Azərbaycanın Xalq şairi Zəlimxan Yaqubun gürcü dilinə tərcümə olunmuş “Azərbaycan torpağıyam” və “Mənə ümid kimi bax” şeirlərinin yayımına başlayıb.

Tərcümə Mərkəzinin yaydığı məlumata görə, şairin yaradıcılığı haqqında geniş məlumatla təqdim olunan şeirlərin gürcü dilinə tərcümə müəllifi Mərkəzin gürcü dili mütəxəssisi, tanınmış şair-tərcüməçi İmir Məmmədlidir.

Əsasən gürcü ədəbiyyatının aparıcı simalarının yaradıcılığını işıqlandıran portal Dövlət Tərcümə Mərkəzi ilə əməkdaşlıq çərçivəsində Azərbaycan ədəbiyyatının yayınına xüsusi yer ayırır. 

Qeyd edək ki, 1950-ci ildə Gürcüstanın Bolnisi rayonunun Kəpənəkçi kəndində anadan olan Xalq şairi, ictimai xadim Zəlimxan Yaqub “Şair harayı”, “Sizi qınamıram”, “Od aldığım ocaqlar”, “Mən sənin qəlbinə necə yol tapım”, “Böyük ömrün dastanı”, “Qayıdaq əvvəlki xatirələrə”, “Gözlərimin nurudu doğulduğum bu torpaq”, “Mən bir dağ çayıyam” kimi şeir kitablarının müəllifidir; O, eyni zamanda 1995–2005-ci illərdə Azərbaycanın Milli Məclisinin deputatı olub. Azərbaycanın “Şöhrət”, Gürcüstanın “Şərəf” ordeni ilə təltif edilib. Zəlimxan Yaqub 2016-cı il yanvarın 9-da dünyasını dəyişib.

“Ədəbiyyat və incəsənət”

(13.07.2023)