Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Türk Dünyası İnfo” İctimai Birliyi “Ədəbiyyatda Cənubi Azərbaycan görüşləri - adlı tədbirlərin təşkili” layihəsinin icrasına başlayıb.
“Ədəbiyyat və incəsənət” portalı xəbər verir ki, İctimai Birliyin məlumatına görə, 3 ay müddətinə icra olunacaq layihənin ideyasının əsasını Prezident İlham Əliyevin Səmərqənddə keçirilən Türk Dövlətləri Təşkilatının IX Zirvə Görüşündə ölkəmizdən kənarda yaşayan soydaşlarımızın hüquqlarına dair söylədiyi tezislər təşkil edir.
Birliyin sədri Dəyanət Osmanlı layihənin məqsədi və aktuallığı barədə qeyd edib ki, bu gün Cənubi Azərbaycandakı soydaşlarımızın dil, təhsil kimi problemləri dövlətimizin maraq dairəsində daha ciddi yer tutur. Bu da müstəqil Azərbaycanın öz millətinə sahiblik hissindən irəli gəlir. Layihə çərçivəsində vətənimizin cənubunda və şimalında yaranan yeni ruhlu milli-aktual mövzulu şeirlərdən ibarət “Çağdaş Bütöv Azərbaycan poeziyası” adlı antologiya hazırlanması nəzərdə tutulur. Layihənin yekununda isə “Ədəbiyyatda Cənubi Azərbaycan görüşləri” adlı tədbir və “Çağdaş Bütöv Azərbaycan poeziyası” kitabının təqdimatı keçiriləcək.
“Ədəbiyyat və incəsənət”
(06.05.2023)
