“Ədəbiyyat və incəsənət” portalında dərc edilən Güney Azərbaycan ədiblərinin ən yaxşı nümunələrini diqqətinizə çatdırmaqdayıq. 

Portalımızın Güney Azərbaycan təmsilçisi Əli Çağlanln təqdimatında bu gün Əkbər İsmayili (Qalan) öz şeirləri ilə hüzurunuzdadır. 

O, bu dəfə “Ancaq sevə bilərəm” söyləyəcək. 

ANCAQ SEVƏ BİLƏRƏM

Səni seçə bilərdim

Bir generalın çiyinlərindən.

Səni, seçə bilərdim

Bir fabrikanın duman borusundan,

Arabanın markasından,

Səni

Bir ayrılıq tragediyasinin uçurumundan qapa bilərdim.

Yalnızlıq quyusunun qaranlığından,

Sona varmış bir sevdanın payızından,

Amma!

Mən şairəm

Nə seçib, nə qapıb, nə ala bilərəm?!

Ancaq,

Səni sevə bilərəm

Çırağqazın ışığı altında

Bir axşam çağı.

Səni sevə bilərəm

Avtobus durağında,

Payız küçəsində, sevgi sərgisində, roman yarpağında.

Mən səni sevə bilərəm

Bir şeir axşamında!

Ədəbiyyat və incəsənət”

(04.07.2023)