“Ədəbiyyat və incəsənət” portalı adətən nəsr nümunələri ilə tanıdığımız Habil Yaşarın bu dəfə yeni şeirini oxuculara təqdim edir. Şeirdə lirik Mən iztirab və kədər içindədir. O, dünyanın gərdişlərindən narahatdır. Yetər ki, Tanrı Xeyir qüvvələri Şər qüvvələrin ağuşuna buraxmasın.

Bu dünyaya xoş gəlmisən, deyənlər,

Yaxşı bilir dünya gəlməz xoşuna.

Yastığına beş-on manat qoyarlar,

Dolanarlar beşiyinin başına.

Ağlayarsan kimsə duymaz səsini,

Göz yaşların axır-axsın, kimə nə.

Bir balaca yatağın var, bəsindi,

Körpəlikdən od sancılar köksünə.

Beşiyindən məsum-məsum baxarsan,

Günah dolu adamların üzünə.

Sən hələki balacasan, uşaqsan,

Xəbərin yox sabahından, özündən...

Və beləcə böyüyərsən ürəksiz,

Qəfəs adlı bir qəfəsin içində.

Ömür sənin gözlərində kiçilər,

Dünya sığar əllərinin içinə.

Və tez çıxar uşaqlığın yadından,

Unudarsan mələk adlı varlığı.

Günahlara “əşi” deyib keçərsən,

İtirərsən təmizliyi, paklığı...

“Ədəbiyyat və incəsənət”

(25.06.2023)