“Ədəbiyyat və incəsənət” portalının Poetik qiraət rubrikasında bu dəfə Əlizadə Nuri sizlərə “Allah, bu nə oynamaqdır” adlı şeirini təqdim edəcək. 

Allah, bu nə oynamaqdı?..

Aşığa bax, gözü göynən,

Barmağı saznan oynayır.

Üstünü çırpan bir uşaq

Oturub toznan oynayır…

Bu zəhərdi, ya eşq camı?

Çıx qarşıla o edamı…

Boğulmaqdan qorxur hamı-

Hamı dayaznan oynayır.

Ömürdü bu, ya səfərdi?

Darıxdım ki… çağır dərdi.

O nəğmə nə bəxtəvərdi-

Bir  gözəl qıznan oynayır.

Bu yol bitdi…dayan, adam,

Sənin deyil o yan, adam.

Dünyayla oynayan adam

Elə bil köznən oynayır…

Hanı ölüm- hara haqdı?

Mən axsağam, yol axsaqdı?

Allah, bu nə oynamaqdı-

Göz yaşı göznən oynayır?!..

“Ədəbiyyat və incəsənət”

(26.05.2023)