“Ədəbiyyat və incəsənət” portalının Poetik qiraət rubrikasında çoxdandır ictimai mahiyyət kəsb edən, habelə fəlsəfi və didaktik şeirlər dərc edilirdi. Oxucularsa təbii ki, daha çox sevgi şeirləri arzulayırlar. Bu dəfə məhz növbədə sevgi şeiridir, Aysel Səfərli “Darıxıram” deyəcək. 

*

Mən darıxmaq adında ən uzun yuxu yatan,

Gözlərini boşluğa geniş açan biriyəm.

Otağının qapısı sabaha bağlı qalan,

Qəribsəyən gecənin tənha bir əsiriyəm...

Əllərin əllərimdə sevginin son ifası,

Ən həzin nəğmə fonum səndən gələn zəng səsi.

Sübhə sağ çıxmaq üçün, yat, yuxun şirin deyən,

Hər axşam gözlədiyim uzaqdakı nəfəsin...

Bir salxım göz yaşını gilələyər yanağım,

Axar yuxu yerinə şeir kirpiklərimdən.

Darıxar ayrılığın qollarımda boş yeri,

Həsrətin sübh çağına bir ah çəkər dərindən.

Hər axşam boş səmada buludu tapdayıram,

Göyün ətəklərini yığıram ayaq altdan...

Çoxdandı unutmuşam yerdəki adamları,

Bilmirəm nə baş verir, daha aşağı qatda...

Mən darıxmaq adında ən uzun yuxu yatan,

Gözlərini boşluğa geniş açan biriyəm.

Otağının qapısı sabaha bağlı qalan,

Qəribsəyən gecənin tənha bir əsiriyəm...

Elə darıxıram ki...

“Ədəbiyyat və incəsənət”

(03.04.2023)