“Ədəbiyyat və incəsənət” Poetik qiraət rubrikasında sizləri gözəl şairimiz

Əlizadə Nurinin yeni şeirləri ilə tanış etməkdədir. Bu dəfəki şeir payınız “Günəş, gəl şəklimi çək” adlanır. 

Hara qoyum bu qəmi?

Əlim gəlmir atmağa.

Hansı yalanı seçim,

Özümü aldatmağa?

Ümidi şikəstlərin,

Ürəyi şikəstədi.

O ay niyə saralıb

Yoxsa o da xəstədi?

Günəş, gəl şəklimi çək,

Sonra yaz arxasını.

…Bir az gözlə, bağlayım

Dərdimin yaxasını…

O daş hardan düşdü ki?-

Sınan bir cam kimiyəm.

Dağıntılar altında

Qalan adam kimiyəm…

Ver əlini, nə olsun

Qara qulam, ilahi?

Quruda üzsəm də mən,

Boğuluram, ilahi…