HƏR GÜN 3 YARPAQ - “Ədəbiyyat və incəsənət” portalı bir neçə gün ardıcıl Təranə Dəmirin şeirlərini sizlərə təqdim etməkdədir. Əminik ki, onları bəyənirsiniz.
Ayrılıq zərrə-zərrə
Mənim içimdən qopur.
Mənim əzablarımdan,
Mənim gücümdən qopur.
Bütün rənglər həsrətdi,
Bütün dadlar ayrılıq.
Bütün sözlər, cümlələr,
Bütün adlar ayrılıq.
Bu şəhər, bu adamlar,
Bu küçə ayrılıqdı.
Bu dəniz, bu dalğalar,
Bu gecə ayrlıqdı.
Dadı, duzu yerində,
Odu, közü yerində,
Bircə ürəyim bilir
Bu necə ayrılıqdı.
Sarılmışam təkliyə,
Bir özüməm, bir hicran.
Ayrılıq adamıyam
Təpədən dırnağacan.
Bu günün öz həsrəti,
Sabahın öz dərdi var.
Deyəsən bircə mənim
Ömrümdən gəlib keçir
Ən saxta məhəbbətlər,
Ən təmiz ayrılıqlar.
*
Gecə-gecə sarılmışam təkliyə,
Evim təkdi, yuvam təkdi, özüm tək.
Heçnə məni bu zülmətin içində
Şirin-şirin ovudammaz özümtək.
Baxıram ki, yuxuludu hər tərəf,
Bircə mənim tənhalığım oyaqdı.
Bu sükutun, sakitliyin içində
Qaranlığı incitmək də günahdı.
Səssizliyin küyü düşür başıma,
Kim alacaq bu gecədən məni, kim?
Xəyalımda rəngli-rəngli nağıllar
Dolanıram dörd yanına təkliyin.
Yanağımı döyəcləyir kölgələr,
Kipriklərim yuvasında qırpınır.
Ürəyimdə haray salır bəlkələr,
Gözlərimdə xatirələr çırpınır.
*
Yuxuyla gerçəyin arasında,
Qaranlıqla işığın kəsişdiyi nöqtədə
Kimsə adımı pıçıldayır,
O dünyadan bu dünyaya qayıdıram.
Kirpiyimin kölgəsi düşür alatoranlığa.
Adım çiliklənir səssizliyin içində
Tavan-tavan, divar-divar.
Dinşəyirəm sükutu,
Qulağım sakitlikdən,
Baxışlarım heyrətdən asılır.
Bayırda yel əsir deyəsən,
yarpaqlar yerini dəyişir budaqda.
Yavaş-yavaş işıq keçir pəncərəmdən,
Dünya gərnəşib oyanır yuxudan,
Bu da Dan!
“Ədəbiyyat və incəsənət”
(28.12.2024)
