Könül, “Ədəbiyyat və incəsənət”

Ən yeni poeziyada isti-isti, mürəkkəbi qurumamış şeirlərin təqdimatını davam etdiririk. Sərraf Talıbın adını eşitməyənlər belə bu şeiri oxuduqdan sonra həmən eşidəcəklər. 

Buyurun. 

BİLƏRSƏNMİ, ƏZİZİM

Sinir tellərim tarıma çəkilib

Boşala bilmir.

İldırım çaxır beynimdə

tufan qabağı.

Bir yağış gözləyirəm, açılsın hər şey!

Nə ildırım səngiyir,

Nə yağış yağır.

Yüksək voltlu xətt kimidir

İçimdəki sinirlər.

Qarsımış beynimə 

zəhlətökən payız yağışı kimi

Şimşəklər çaxır.

Kimə üzümü tutum ki,

Axı, bu adamların heç üzü yoxdur!

 Mən kimdən imdad diləyim ki,-

Min ildir diləyirəm, 

Nə olub ki?!

Başımı sarıma, canım,

Gözümü bağlama, canım,

Quru dodaqlarıma su vurma, canım,

Onsuz da havam çatmır...

Sinirlərimə bir parça bulud 

qoya bilərsənmi?

Dağılmış ruhumu yenidən

toxuya  bilərsənmi?

Alnıma yazılanı

oxuya bilərsənmi?

Bilərsənmi, əzizim,

Bilərsənmi, canım, gözüm,

Bilərsənmi...

“Ədəbiyyat və incəsənət”

(09.10.2024)