Azərbaycan Yazıçılar Birliyinin üzvü  Coşqun Xəliloğlunun redaksiyamıza ünvanlanan növbəti şeirində doğma yurdumuz vəsf olunur. Şeiri oxucularımıza təqdim edirik.

DOĞMA YURDUMUZUN

Hər eldə xoş sorağı var,                             

Bərəkətli torpağı var,

Şiş ucları göyə çatan

Savalanı, Şahdağı var,

Bizim doğma yurdumuzun.

Bir bax hər yanı gözəldir,

Mili, Muğanı gözəldir.

Quba, Şəki laləzardır,

Dağı, Aranı gözəldir

Bizim doğma yurdumuzun.

Tükənməzdir nefti, qazı,

Bəxtiyardır oğlu, qızı,

Qazanıbdır müstəqillik,

Əbədi gəlibdir yazı

Bizim doğma yurdumuzun.

Bir cənnətdir başdan-başa,

Buz bulaqlar gəlir xoşa,

Göllərinin öz yeri var,

Bağ-meşəsi bir tamaşa

Bizim doğma yurdumuzun.

Tarixə bir yetir nəzər,

Hünəri dillərdə gəzər,

Xoşbəxtlik yolundadır,

Üzünə güləcək səhər

Bizim doğma yurdumuzun.

Könül dostu sazdır, tardır,

Muğamatı ecazkardır,                                

Ədalət yolunu tutub,

Övladları düz ilqardır

Bizim doğma yurdumuzun.

Qurban mamırlı daşına,                                                                               

Dolanım yüz yol başına,

Laləzardır yazı, yayı,                           

Heyran qalmışam qışına

Bizim doğma yurdumuzun.

Qazandıq biz şanlı zəfər,

Üzümüzə doğdu səhər,

Şuşamıza qovuşmuşuq,

Kədəri, qüssəsi bitər

Bizim doğma yurdumuzun.

Amma qəlbdə var nisgili,

Ayrı düşüb neçə eli,

Təbriz hələ qan ağlayır,

Yağıdadır Göyçə gölü

Bizim doğma yurdumuzun.

İanırıq gün gələcək,

Tale üzünə güləcək,

Həqiqətə söykəndiyi

Amalı açacaq çiçək

Bizim doğma yurdumuzun.

“Ədəbiyyat və incəsənət”

(24.09.2024)